చీలిక దిశగా సమాజ్ వాదీ..?

సమాజ్ వాదీ పార్టీలో ముసలం ముసురుకుంది. తండ్రి తనయుడు బాబాయ్ ల మధ్య విబేధాలు ముదిరిపాకాన పడ్డాయి. వచ్చే యూపీ అసెంబ్లీ ఎన్నికల్లో అభ్యర్థులను ఖరారు చేస్తున్న 325మంది లిస్టును ప్రకటించిన అధినేత ములాయం సింగ్ యాదవ్..ను తోసిరాజని...తనయుడు..సీఎం అఖిలేష్ యాదవ్ 235 మందితో మరో జాబితా విడుదల చేయడం సంచలనం సృష్టించింది.

403 మందితో కూడా జాబితాను అఖిలేష్ తండ్రికి అందించగా అది పక్కన బెట్టి తమ్ముడు పార్టీ యూపీ అధ్యక్షుడు శివపాల్ యాదవ్ ప్రిపేర్ చేసిన లిస్టులో నుంచి 325 మంది క్యాండిడేట్లను ములాయం ప్రకటించారు. ఇందులో అఖిలేష్ వర్గానికి మొండి చేయి చూపించారు.

దీంతో అగ్గిమీద గుగ్గిలం అయిన అఖిలేష్ మరుసటి రోజే 235 మందితో కూడిన లిస్టును ప్రకటించారు.

అటు శివపాల్ అదే రోజు మరో 68 మంది లిస్టు ప్రకటించారు. దీంతో ఎస్పీలో ఏం జరుగుతుందో? ఎవరూ అసలుపార్టీ అధికారికంగా ప్రకటించిన క్యాండిడేట్లో తెలియని పరిస్థితి నెలకొంది.

ఎన్నికల్లో పోటీ చేసేందుకు గ్రౌండ్ ప్రీపేర్ చేసుకోవాలని అఖిలేష్ తమకు చెప్పారని ఆయన లిస్టులో చోటు దక్కిన ఓ సిట్టింగ్ ఎమ్మెల్యే తెలిపారు.

తండ్రి ప్రకటించిన లిస్టులో ఉన్నవారికి అఖిలేష్ చోటు కల్పించలేదు. దీంతో ములాయం సీరియస్ గా ఉన్నారు. పైగా తాను ఫైనల్ చేసి ప్రకటించిన లిస్టుకు విరుద్ధంగా మరో లిస్టు ప్రకటించడం ‘నేతాజీ’కి మింగుడు పడటం లేదు.

ఇదిలా ఉండగా, అఖిలేష్ మరో సీఎం కావడం పార్టీలో చాలామందికి ఇష్టం లేదని, ప్రజలు మాత్రం ఆయనే మరోసారి ముఖ్యమంత్రి కావాలని కోరుతున్నారని ములాయం కజిన్ రామ్ గోపాల్ యాదవ్ వ్యాఖ్యానించడం ఎస్పీ ఫ్యామిలీలో ముసురుకున్న వివాదాన్ని బట్టబయలు చేస్తోంది.

అఖిలేష్ ఎస్పీని వీడి కొత్త పార్టీ పెడ్తారనే ఊహాగానాలు జోరుగా సాగుతున్నాయి.