‘స్టెరిలైట్’కు మద్దతుగా మొన్న రాందేవ్, నేడు జగ్గీ వాసుదేవ్!

తమిళనాడు తూత్తుకూడిలోని స్టెరిలైట్ రాగి పరిశ్రమకు వ్యతిరేకంగా చేపట్టిన ఉద్యమం హింసాత్మకంగా మారి ఉద్యమకారులపై పోలీసులు కాల్పులకు పాల్పడటంతో 16 మంది ప్రాణాలు కోల్పోగా, వందలాది మంది గాయపడిన విషయం తెలిసిందే. ప్రతిపక్ష పార్టీలు పెద్ద ఎత్తు ఆందోళన చేయడంతో తప్పనిసరి పరిస్థితుల్లో పరిశ్రమను తమిళనాడు ప్రభుత్వం మూసివేసింది. అయితే ఈ పరిశ్రమ మూసివేతపై ప్రముఖ ఆధ్యాత్మిక గురువు జగ్గీ వాసుదేవ్ చేసిన ట్వీట్ సోషల్ మీడియాలో వైరల్‌గా మారింది. పర్యావరణ కాలుష్యాన్ని సాకుగా చూపి పరిశ్రమలను మూసేయడం మంచిది కాదని అన్నారు. ‘నేను రాగి కరిగించే నిపుణుడిని కాదు, కానీ దేశంలో రాగిని మాత్రం విస్తారంగా వినియోగిస్తారు... దీన్ని ఒకవేళ ఉత్పత్తి చేయకపోయినా చైనా నుంచి కొనుగోలు చేస్తాం.. పర్యావరణ ఉల్లంఘనలను చట్టపరంగా పరిష్కరించుకోవచ్చు.. పెద్ద వ్యాపారాలను మూసేయడం ఆర్థిక ఆత్మహత్యకు పాల్పడటం లాంటిదే’ అని ట్వీట్ చేశారు.

‘స్టెరిలైట్ లేదా మరో పరిశ్రమో, రాజకీయ పార్టీకో మద్దతు తెలపడం లేదు.. పర్యావరణ నిబంధనల ఉల్లంఘనలను చట్టపరంగా పరిష్కారించుకోవచ్చు.. ప్రజా ఆస్తులను తగలబెట్టడం లేదా వ్యాపారాలను మూసేయడం దేశానికి మంచిది కాదు.. దీనిపై రాజకీయాలు వద్దు’ అని హితవు పలికారు. అంతకు ముందు ఓ చానల్‌కు ఇచ్చిన ఇంటర్వ్యూలో సద్గురు మాట్లాడుతూ... రాజకీయ ఒత్తిడితో పరిశ్రమను మూసివేయడం సరైంది కాదు.. పరిశ్రమ నుంచి వెలువడే వ్యర్థాల నుంచి పర్యావరణ సమతౌల్యతను కాపాడటానికి అనేక మార్గాలున్నాయి.. ఇలాంటి కారణాలతో ఒకదాని తర్వాత ఒకటి వ్యాపారాలు మూసుకుంటూ పోతే దేశాన్ని ఎక్కడకు తీసుకెళతారు అని ప్రశ్నించారు.


యోగా గురువు రాందేవ్ బాబా కూడా స్టెరిలైట్‌కు మద్దతుగా కొద్ది రోజుల కిందట ట్వీట్ చేశారు. లండన్‌లో వేదాంత ఎగ్జిక్యూటివ్ ఛైర్మన్ అనిల్ అగర్వాల్‌తో సమావేశం అనంతరం రాందేవ్ స్పందించారు. మరోవైపు కర్మాగారాన్ని మూసివేయడంతో అందులో పనిచేస్తున్న దాదాపు 3 వేల మంది ఉద్యోగుల పరిస్థితి అగమ్యగోచరంగా మారింది. కంపెనీ మూసివేయడంతో తమకు పనిలేకుండా పోయిందని, కొంతమంది పరిశ్రమ గురించి అసత్య ప్రచారాలు చేయడం వల్లే ఇబ్బందులు ఎదుర్కొంటున్నామని ఆవేదన వ్యక్తం చేస్తున్నారు.

Read This Story in Tamil