మొన్నటికి కమల్ ఫ్రెండే, ఇప్పుడు తిట్టాడు!

రాజకీయాల్లోకి వస్తానంటున్న కమల్ హాసన్ పై తీవ్రంగా విరుచుకుపడ్డాడు డీఎంకే నేత స్టాలిన్. రాజకీయాల్లోకి ఎవరైనా రావొచ్చు.. అని అంటూనే, కమల్ లాంటి పిచ్చి వాళ్లకు మాత్రం రాజకీయాల్లో స్థానం లేదని స్టాలిన్ తీవ్ర వ్యాఖ్యలు చేశాడు. ఈ విధంగా కమల్ హాసన్ పై తన వ్యతిరేకతను వ్యక్తం చేశాడు స్టాలిన్. ఆసక్తికరమైన అంశం ఏమిటంటే.. మొన్నటి వరకూ కమల్ తో డీఎంకే కు సన్నిహిత సంబంధాలుండేవి. డీఎంకే అధికార పత్రిక వార్షికోత్సవ కార్యక్రమానికి కూడా కమల్ హాజరయ్యాడు. ఆ సందర్భంగా డీఎంకే అధినేత కరుణానిధిని, స్టాలిన్ ను కమల్ ప్రశంసల్లో ముంచెత్తాడు.

తనను రాజకీయాల్లోకి రావాలని కరుణానిధి దశాబ్దాల కిందే పిలుపునిచ్చాడని ఆ కార్యక్రమంలో కమల్ చెప్పాడు. ఇలాంటి సానిహిత్యం వ్యక్తం అయినప్పటికీ..ఇప్పుడు కమల్, డీఎంకేల శత్రుత్వం తీవ్ర స్థాయికి చేరినట్టుంది. మరి దీనికి కారణం కమల్ ఇటీవల చేసిన వ్యాఖ్యానాలే. డీఎంకే, అన్నాడీఎంకేలు అవినీతిమయమైన పార్టీలు.. అని కమల్ వ్యాఖ్యానించాడు. అన్నాడీఎంకేనే గాక తమ పార్టీని కూడా అనే సరికి స్టాలిన్ కు కమల్ పై కోపం వచ్చినట్టుగా ఉంది.

అందుకే.. కమల్ ఒక పిచ్చివాడని, అలాంటి వారికి రాజకీయాల్లో స్థానం లేదని స్టాలిన్ విమర్శించాడు. కమల్ హాసన్ మాట మారుస్తున్నాడని, కాసేపు ఎర్ర చొక్కా అని కాసేపు కాషాయ చొక్కా అని.. ఇలా స్థిరత్వం లేకుండా వ్యవహరిస్తున్నాడని, అతడికి పిచ్చి అని స్టాలిన్ వ్యాఖ్యానించాడు.