Wrestlers Protest: రెజ్లర్లకు దన్నుగా రైతు సంఘాల నాయకులు

Wrestlers Protest: జంతర్ మంతర్ వద్ద ఆందోళన చేస్తున్న రెజ్లర్లకు.. రోజు రోజుకూ మద్దతు పెరుగుతోంది. తాజాగా.. వారికి రైతు సంఘాల నేత రాకేష్ టికాయత్, ఇతర నాయకులు మద్దతుగా నిలిచారు. రెజ్లర్ల పోరాటానికి తామంతా అండగా ఉంటామని స్పష్టం చేశారు. ఉద్యమాన్ని మరింత ఉధృతం చేస్తామన్నారు. బ్రిజ్‌ భూషణ్‌‌ను జైల్లో పెట్టాలని డిమాండ్ చేశారు. రెజ్లర్లపై చేయి చేసుకున్న వాళ్లకు శిక్ష పడేలా చూడాలన్నారు. మే 21 వరకు ప్రభుత్వానికి గడువు ఇస్తున్నామని అల్టిమేటం Rakesh Tikait జారీ చేశారు.'రెజ్లర్ల ఉద్యమంలో మా గ్రామాల వారు కూడా పాల్గొంటారు. వాళ్లు పగలు వస్తారు, రాత్రి వెళ్లిపోతారు. రాత్రి బస చేయాల్సిన వారు కూడా బస చేయవచ్చు. మేము బయటి నుంచి మద్దతిస్తాం. 21వ తేదీ వరకు చర్చలు జరిపి ప్రభుత్వం పరిష్కారం చూపకపోతే.. ఆ తర్వాత మళ్లీ కార్యచరణ ప్రకటిస్తాం. రెజ్లర్లు మన దేశానికి వారసత్వం. వారికి అన్ని విధాలా సాయం చేయాలి. వారి కోసం పోరాడటానికి మనం సిద్ధంగా ఉండాలి. దేశవ్యాప్తంగా ఈ ఉద్యమాన్ని నడిపేందుకైనా వెనుకాడొద్దు. 21న 5 వేల మంది రైతులు జంతర్ మంతర్‌కు పాదయాత్రగా వస్తారు' అని రైతు సంఘాల నేతలు స్పష్టం చేశారు.