సుప్రీం కోర్టులో నితీశ్ ప్రభుత్వానికి ఊరట

నితీశ్ కుమార్ నేతృత్వంలోని బీహార్ ప్రభుత్వానికి సుప్రీం కోర్టులో ఊరట లభించింది. బీహార్‌లో విధించిన మద్య నిషేధం చట్ట విరుద్ధమని దాన్ని రద్దు చేస్తూ పాట్నా హైకోర్టు తీర్పునిచ్చింది. దీన్ని సవాలు చేస్తూ నితీశ్ ప్రభుత్వం అక్టోబర్ 3న సుప్రీం కోర్టును ఆశ్రయించింది. వాదనలు విన్న అత్యున్నత ధర్మాసనం పాట్నా హైకోర్టు తీర్పుపై స్టే విధించింది. మద్య నిషేధం, మానవ హక్కులు వేరు వేరు అంశాలని, ఒకదానితో ఒకటి ముడి పెట్టాల్సిన అవసరం లేదని సుప్రీం బెంచ్ వ్యాఖ్యానించింది.
రాష్ట్రంలో మద్యం అమ్మడం, తాగడం నిషేధమని పేర్కొంటూ ఏప్రిల్ 5న బీహార్ ప్రభుత్వం నోటిఫికేషన్ జారీ చేసింది. అయితే ఇది రాజ్యాంగ విరుద్ధమని, దీన్ని అమలు చేయడానికి వీల్లేదని పేర్కొంటూ ఆ జీవోను సెప్టెంబర్ 30న పాట్నా హైకోర్టు రద్దు చేసింది. కోర్టు తీర్పు వెలువడిన రెండు రోజుల తర్వాత అంటే గాంధీ జయంతి రోజున ప్రభుత్వం కొత్త నిబంధనలను తీసుకొచ్చింది. ఇళ్లలో మద్యం తయారీకి ఉపయోగించే ముుడి సరుకులు దొరికితే ఇంట్లో ఉన్న పెద్దవారందరినీ అరెస్టు చేస్తామని ప్రభుత్వం ప్రకటించింది.