ట్రిపుల్ తలాక్‌పై సుప్రీం తాత్కాలిక నిషేధం!

ట్రిపుల్ తలాక్‌పై సుదీర్ఘ వాదనలనంతరం సుప్రీంకోర్టు మంగళవారం తీర్పు వెలువరించింది. మూడుసార్లు తలాక్ ఉచ్చరించి విడాకులు తీసుకోవడం చెల్లదని సర్వోన్నత న్యాయస్థానం తేల్చి చెప్పింది. అయితే, దీనిపై పార్లమెంట్‌లో ఓ చట్టాన్ని తీసుకురావాలని, అంతవరకూ తమ ఆదేశాలు వర్తిస్తాయని స్పష్టం చేస్తూ, ఇంజక్షన్ ఆర్డర్ జారీచేసింది. ఈ విషయంలో ప్రభుత్వం చట్టం తీసుకొచ్చేంత వరకూ తమ ఆదేశాలు అమలులో ఉంటాయని పేర్కొంది. అసలు కేసులో కల్పించుకోవాలన్న ఉద్దేశం తమకు లేదని, అయితే, దీని తీవ్రత దృష్ట్యా, తాత్కాలిక ఆదేశాలు ఇస్తూ, నిర్ణయాధికారాన్ని పార్లమెంటుకే వదిలేస్తున్నామని తెలిపింది. ముస్లిం సమాజంతో పాటు దేశమంతా ఎంతో ఆసక్తిగా ఎదురుచూస్తున్న ట్రిపుల్ తలాక్ విషయంలో ఐదుగురు న్యాయమూర్తులతో కూడిన సుప్రీంకోర్టు రాజ్యాంగ ధర్మాసనం కీలక తీర్పిచ్చింది.

సుదీర్ఘకాలంగా వాదనలు విన్న న్యాయస్థానం, ట్రిపుల్ తలాక్‌పై ఆరు నెలల పాటు స్టే విధిస్తున్నామని, ఈలోగా చట్ట సవరణ చేసి, ట్రిపుల్ తలాక్ చెల్లకుండా పార్లమెంటులో కొత్త చట్టాన్ని తేవాలని కోరింది. మూడు సార్లు తలాక్ చెప్పి భార్యను వదిలించుకోవాలని చూడటం అత్యంత హేయమైన చర్యగా ధర్మాసనం అభివర్ణించింది. ఫోన్ లేదా సామాజిక మాధ్యమాల్లో తలాక్ చెప్పడం చట్ట సమ్మతం కాదని, అలాంటివి చెల్లుబాటుకావని పేర్కొంది. కొత్త చట్టం తెచ్చేటప్పుడు ముస్లిం లాబోర్డు అభిప్రాయాలను కూడా పరిగణనలోకి తీసుకోవాలని పార్లమెంటుకు సుప్రీంకోర్టు సూచించింది.