పవర్ కట్ ఎఫెక్ట్.. టార్చ్‌లైట్ల వెలుగులో ఆపరేషన్

బీహార్‌లో జరిగిన ఓ ఘటన ఇప్పుడు హాట్‌టాపిక్‌గా మారింది. పవర్ కట్ ఎఫెక్ట్‌తో ఓ ఆస్పత్రిలో టార్చ్‌లైట్ల వెలుగులో ఆపరేషన్ చేశారు. సహర్సాలోని సదర్ ఆస్పత్రికి రోడ్డుప్రమాదంలో గాయపడిన ఒకరిని తీసుకొచ్చారు. అతడికి ఆపరేషన్ చేయాల్సి వచ్చింది. అయితే అదే సమయంలో పవర్ కట్ ఉండటంతో ఏం చేయాలో డాక్టర్లకు అర్థం కాలేదు. ఇక తప్పని పరిస్థితుల్లో టార్చ్‌లైట్ల వెలుగులో సర్జరీని పూర్తి చేశారు. పేషెంట్‌ను కాపాడేందుకే ఇలా చేయాల్సి వచ్చిందని డాక్టర్లు చెబుతున్నారు.

ఈ విషయంలో ప్రభుత్వ అధికారుల తీరుపై మాత్రం విమర్శలు వస్తున్నాయి. అంత పెద్ద ఆస్పత్రిలో కనీసం జనరేటర్ సౌకర్యం లేకపోవడం ఏంటని జనాలు మండిపడుతున్నారు. డాక్టర్ల చొరవతో రోగి ప్రాణాలతో బయటపడ్డాడు కాబట్టి సరిపోయింది కాని... లేకుంటే పరిస్థితి ఏంటని బంధువులు ఆవేదన వ్యక్తం చేశారు. ఇంత జరిగినా ఇప్పటి వరకు అధికారులు ఎవ్వరూ స్పందించ లేదు.