దేశంలోనే అత్యంత ప్రియమైన నేతగా సుష్మా

ప్రపంచంలో అతిపెద్ద ప్రజాస్వామ్య దేశమైన భారత్‌లో అత్యధికంగా అభిమానించే ప్రియమైన రాజకీయ నేతగా విదేశాంగ మంత్రి సుష్మా స్వరాజ్ నిలిచారు. అమెరికాకు చెందిన వాల్‌స్ట్రీట్ జర్నల్ తన సంపాదకీయంలో సుష్మాపై ఓ ఆర్టికల్‌ను ప్రచురించింది. స్టాన్‌ఫర్డ్ యూనివర్సిటీ హూవర్ ఇన్‌స్టిట్యూట్‌ పరిశోధకుడైన తుంకు వరదరాజన్ ఈ వ్యాసాన్ని వాల్‌స్ట్రీట్ జర్నల్ సంపాదకీయంలో రాశారు. భారతీయులు ఎక్కువగా అభిమానించే నేతగా ఎదిగిన సుష్మా స్వరాజ్, విదేశాల్లోని తమ పౌరుల కోసం అహర్నిశలు శ్రమిస్తున్నారని పేర్కొన్నారు. 65 ఏళ్ల సుష్మా విదేశాల్లోని భారతీయుల సమస్యల పరిష్కారానికి చురుకుగా వ్యవహరిస్తూ సహాయం చేస్తున్నారని కొనియాడారు.

ప్రధాని నరేంద్ర మోడీ అప్పగించిన బాధ్యతలను సమర్థంగా నిర్వహిస్తూ, విదేశాంగ, భద్రత అంశాలపై నియంత్రణ సాధించారని ఆర్టికల్‌లో పేర్కొన్నారు. ట్విట్టర్‌ ద్వారా నిరంతరం అందుబాటులో ఉంటూ 8.69 మిలియన్ ఫోలోవర్లను కలిగిన సుష్మా... ట్విట్టర్‌లో అత్యధిక ఆదరణ కలిగిన టాప్ 10 రాజకీయ నేతల్లో ఒకరుగా గుర్తింపు పొందారు. సుష్మా చేసిన ట్వీట్స్‌లో అత్యధికం ఆమె సహాయం కోసం అభ్యర్థించిన వారికి ప్రతిస్పందనగా చేసినవేనని వరదరాజన్ తెలిపారు. భారత్, పాక్‌ల మధ్య ఉద్రిక్తతలు చోటుచేసుకున్న ప్రస్తుత పరిస్థితుల్లో పాకిస్థాన్ పౌరులు సాయం కోసం సుష్మాను ట్విట్టర్ ద్వారా అర్ధించడం, వీటికి ఆమె స్పందన తెలియజేయడాన్ని కూడా ఆర్టికల్లో ప్రస్తావించారు.

పాక్‌లో వైద్యం అత్యంత ఖరీదుకావడం, ఆస్పత్రుల సంఖ్య పరిమితంగా ఉండటంతో చాలా మంది చికిత్స కోసం భారత్‌‌ను ప్రత్యామ్నాయంగా ఎంపికచేసుకుంటూ, మెడికల్ వీసాల కోసం సహాయం చేయమని కోరుతున్నారు. ఇటీవల పాకిస్థాన్‌కు చెందిన రోహాన్ సిద్ధిఖీ అనే బాలుడు గుండె ఆపరేషన్‌కు సుష్మా సాయం చేసిన విషయాన్ని గుర్తుచేశారు. శస్త్రచికిత్స తర్వాత ఆ బాలుడి తండ్రి మాట్లాడుతూ నా బిడ్డ హృద‌య స్పందనల్లో మేడం సుష్మా స్వరాజ్ అనే శబ్దం వినపడుతుందని అన్నారు.... దీనిపై స్పందించిన సుష్మా రోహన్ ఎప్పుడూ నవ్వుతూ ఉండు అంటూ ట్విట్ చేశారని వరదరాజన్ వివరించారు.