అరుణాచల్ ప్రదేశ్ నెక్ట్స్ సీఎం ఎవరు?

అరుణాచల్ ప్రదేశ్ ప్రభుత్వం సంక్షోభంలో పడిన సంగతి తెలిసిందే. అధికారంలో ఉన్న పీపీఏ పార్టీ అధిష్టానం ముఖ్యమంత్రి పేమా ఖండూని పార్టీ నుంచి గురువారం సాయంత్రం తాత్కాలికంగా సస్పెండ్ చేసింది. ఆయన స్థానంలో కొత్త ముఖ్యమంత్రిని నియమించనున్నట్టు తెలిపింది. కాగా కొత్త సీఎంగా టకమ్ పరియో పేరును ఖరారు చేసింది అధిష్టానం. ఆయన పేరును గవర్నర్ వి.షణ్ముగనాథన్‌కు పంపనుంది.

కాంగ్రెస్‌కు చెందిన పేమా ఖండు అక్టోబర్‌లో కొంతమంది ఎమ్మెల్యేలతో కలిసి పీపీఏ పార్టీలోకి వచ్చారు. కేవలం సీఎం కావడం కోసం పార్టీ మారారు. సీఎం కుర్చీ ఎక్కాక పీపీఏ పార్టీకి అనుకూలంగా పనిచేయడం లేదు. దీంతో పార్టీ అధిష్ఠానం సస్పెండ్ చేసింది. అతనితో పాటూ డిప్యూటీ సీఎంని, అయిదుగురు ఎమ్మెల్యేలను కూడా సస్పెండ్ చేసింది. అయితే పేమా ఖండూ శాసనసభలో బలనిరూపణ చేసుకుని తానే సీఎంగా కొనసాగేందుకు పావులు కదుపుతున్నారు. పీపీఏ అధిష్ఠానం మాత్రం తమ పార్టీకి చెందిన వ్యక్తినే సీఎంగా చేయాలని భావిస్తోంది.

కాగా అరుణాచల్ ప్రదేశ్‌లో పీపీఏ-బీజేపీ సంకీర్ణ ప్రభుత్వం అధికారంలో ఉంది. 60 మంది సభ్యులున్న అసెంబ్లీలో పీపీఏకు చెందిన 42 ఎమ్మెల్యేలు, 12 మంది బీజేపీ ఎమ్మెల్యేల మద్దతు పేమా ఖండూకే ఉందని అతని సన్నిహిత వర్గాలు చెబుతున్నాయి. అలాగే రాష్ట్ర బీజేపీ ఇన్‌ఛార్జ్ మాట్లాడుతూ ముఖ్యమంత్రిగా ఖండూని తీసే హక్కు పీపీఏ అధిష్ఠానానికి లేదని చెప్పారు. తమ మద్దతు ఖండూకేనని తేల్చి చెప్పారు. దీంతో అరుణాచల్ ప్రదేశ్ రాజకీయం రసకందాయంలో పడింది.

ఏడాదిలో అరుణాచల్ ప్రదేశ్‌ను ముగ్గురు సీఎంలు పాలించారు. జనవరి 26, 2016 నుంచి ఫిబ్రవరి 19 2016 వరకు రాష్ట్రపతి పాలన సాగిందక్కడ. ఫిబ్రవరి 19 నుంచి 13 జులై 2016 వరకు కలిఖో పుల్, జులై 13 నుంచి జులై 17 వరకకు అంటే కేవలం మూడు రోజులే నుబమ్ తుకి ముఖ్యమంత్రులగా పనిచేశారు. జులై 17న పేమా ఖండూ బాధ్యతలు స్వీకరించారు.