టాక్ టూ ఏకే: కేజ్రివాల్ ఏమేం మాట్లాడారు!

‘టాక్ టూ ఏకే’ పేరిట అరవింద్ కేజ్రివాల్ ఆదివారం ఉదయం 11 గంటల నుంచి వివిధ అంశాలపై దేశ ప్రజలతో తన భావాలను పంచుకున్నారు. పెరిస్కోప్ యాప్ ద్వారా ఆయన మాట్లాడిన విషయాలను లైవ్‌లో ప్రసారం చేశారు. ఈ సందర్భంగా ఆయన ప్రస్తావించిన విషయాలు మీకోసం...
మేం చేసిన అభివృద్ధిని చూసేందుకు ఆహ్వానిస్తున్నా అని ప్రకటించిన కేజ్రివాల్.. ఢిల్లీ ప్రభుత్వాన్ని క్రియారహితగా మార్చేందుకు కేంద్రం ప్రయత్నిస్తోందని ఆరోపించారు. తమ ఎమ్మెల్యేలపై తప్పుడు కేసులకు మోపి అరెస్టు చేస్తున్నారన్నారు. జైలు కెళ్లడానికి సిద్ధంగా ఉండండి అని తన ఎమ్మల్యేలకు పిలుపు ఇచ్చినట్లు ఆయన తెలిపారు. కేంద్రం వద్ద అధికారం ఉండటంతో నా కళ్ల ముందే ఎవరైనా లంచం తీసుకున్నా ఏం చేయగలిగే స్థితిలో లేనని తన నిస్సహాయతను వ్యక్తం చేశారు. కేంద్రం, ఢిల్లీ ప్రభుత్వాల మధ్య పరిస్థితిని భారత్, పాక్ స్థాయికి తీసుకురావద్దని.. కావాలంటే క్రెడిట్ మొత్తం ప్రధానినే తీసుకోవాలన్నారు.
ఢిల్లీలో ఏ స్థాయిలో అభివృద్ధి జరుగుతుందో తెలియజేసేందుకే ఇతర రాష్ట్రాల్లోనూ ప్రకటనలు ఇస్తున్నామన్నారు. ఎమ్మెల్యేల వేతనాలను 400 రెట్లు పెంచామని విమర్శిస్తున్నారు.. కానీ నెలకు రూ.12,000 సంపాదనతో ఏం చేయగలమో చెప్పండి. అందుకే ఎమ్మెల్యేల వేతనాన్ని రూ.50 వేలకు పెంచామని వివరణ ఇచ్చారు. ఢిల్లీకి పూర్తి స్థాయి రాష్ట్ర హోదా విషయమై ఒపీనియన్ పోల్ ద్వారా ప్రజల ఆలోచన ఏంటో తెలుసుకుంటామన్నారు. ఢిల్లీ తరహాలోనే పంజాబ్‌లోనూ అభివృద్ధి పనులు చేయాలని మేం భావిస్తున్నామన్నారు. ఈ శీతాకాలంలో తిరిగి సరి బేసి విధానాన్ని అమలు చేసే విషయమై ఆలోచిస్తున్నట్లు ఆయన తెలిపారు. నన్ను చూడగానే గుజరాత్ ప్రజలు చాలా సంతోషించారన్నారు. మరో నెల రోజులు లేదా నెలన్నరలో మళ్లీ ఇలా కలుద్దామంటూ ముగించారు.

పంజాబ్, గోవా, గుజరాత్ ఎన్నికలు సమీపిస్తోన్న నేపథ్యంలో ఆమ్ ఆద్మీ పార్టీ గురించి, ఢిల్లీలో తమ పనితీరును గురించి ప్రచారం చేసుకునేందుకు ఉపయుక్తంగా ఉంటుందనే యోచనతోనే ఢిల్లీ సీఎం ‘టాక్ టూ ఏకే’ కార్యక్రమాన్ని ఏర్పాటు చేశారని భావిస్తున్నారు.

LIVE on #Periscope: Talk to AK https://t.co/4B6Y84r2t9 — Arvind Kejriwal (@ArvindKejriwal) July 17, 2016