దేశంలో కెల్లా ఎత్తైన జాతీయ జెండా ఇదే!

దేశంలోకెల్లా ఎత్తైన జాతీయ జెండాను ఆదివారం భారత్- పాక్ సరిహద్దులో ఆవిష్కరించారు. పంజాబ్‌లోని అటారీ-వాఘా సరిహద్దు దగ్గర 350 అడుగుల ఎత్తైన జెండా స్తంభంపై 120 అడుగుల పొడవు, 80 అడుగుల వెడల్పుగల త్రివర్ణ పతాకాన్నిఎగరేశారు. ఈ త్రివర్ణ పతాకం పాకిస్థాన్‌లోని లాహోర్ నుంచి కూడా కనపడుతుందట. జెండా స్థూపం కాంక్రీట్ బేస్‌ను 30 అడుగుల పొడవు, అంతే వెడల్పుతో నిర్మించారు.

గతేడాది ఏప్రిల్‌లో పంజాబ్ క్యాబినెట్ మినిస్టర్ అనిల్ జోషి ఈ జెండా స్తంభానికి శంకుస్థాపన చేశారు. 2017 జనవరి నాటికి దీన్ని పూర్తిచేస్తామని ఆయన అప్పట్లో ప్రకటించారు. వేలాది మంది పర్యాటకులు విచ్చేసే అటారీ- వాఘా అంతర్జాతీయ సరిహద్దులో దేశంలో కెల్లా పొడవైన జాతీయ జెండా ప్రత్యేక ఆకర్షణగా నిలవనుంది. 180 కిలోమీటర్ల వేగంతో గాలులు వీచినా చెక్కు చెదరకుండా ఉండేలా జాగ్రత్తలు తీసుకున్నారు.

ఈ ప్రాజెక్ట్ కోసం రూ.3.5 కోట్ల ఖర్చు చేశారు. భవిష్యత్తులో ఈ జెండా నిర్వహణను ఓ ప్రైవేట్ సంస్థకు అప్పగించే ఆలోచనలో ఉన్నట్లు ఏఐటీ ఛైర్మన్ సురేశ్ మహాజన్ అన్నారు. ఇప్పటి వరకు 293 అడుగుల ఎత్తున రాంచీలో ఉన్న జాతీయ జెండానే దేశంలో కెల్లా ఎత్తైనదిగా పేరు గాంచింది. ఈ త్రివర్ణ పతాకం ఆవిష్కరణపై పాక్ రెంజర్లు అభ్యంతరం వ్యక్తం చేస్తున్నట్లు ఇంటెలిజెన్స్ వర్గాలు తెలిపాయి. అంతే కాదు దీన్ని గూఢచర్యానికి వినియోగిస్తారని కూడా ఆరోపిస్తున్నాయట.