తమిళనాడులో జులై 31 వరకు లాక్‌డౌన్ పొడిగింపు

కరోనా కేసులు తగ్గుముఖం పట్టకపోవడంతో పలు రాష్ట్రాలు లాక్‌డౌన్ పొడిగిస్తూ నిర్ణయం తీసుకుంటున్నాయి. త‌మిళ‌నాడులో జులై 31 వ‌ర‌కు లాక్‌డౌన్‌ను పొడిగిస్తున్నట్లు ఆ రాష్ట్ర ప్రభుత్వం సోమవారం (జూన్ 29) ప్రక‌టించింది. గ్రేట‌ర్ చెన్నై ప‌రిధిలోని చెన్నై, కాంచిపురం, చెంగ‌ల్‌పట్టు, తిరువ‌ళ్లువార్ ప్రాంతాల్లో జులై 5 వ‌ర‌కు క‌ఠినంగా లాక్‌డౌన్ అమ‌ల్లో ఉంటుంద‌ని ప్రభుత్వం స్పష్టం చేసింది. గ్రేట‌ర్ చెన్నై పోలీస్ లిమిట్స్‌తో పాటు మధురైలోనూ జులై 5 వ‌ర‌కు పూర్తి స్థాయి లాక్‌డౌన్ కొన‌సాగుతుంద‌ని తెలిపింది.

రాష్ట్రవ్యాప్తంగా జులై 31 వ‌ర‌కు స‌డ‌లింపుల‌తో కూడిన లాక్‌డౌన్ అమ‌ల్లో ఉంటుందని తమిళనాడు ప్రభుత్వం తెలిపింది. ఇప్పటికే మ‌హారాష్ట్రతో పాటు జార్ఖండ్, అసోం తదితర రాష్ట్రాలు జులై 31 వ‌ర‌కు లాక్‌డౌన్‌ను పొడిగిస్తున్నట్లు ప్రకటించాయి.

మరోవైపు.. క‌రోనా క‌ట్టడి కోసం విధించిన నాలుగో విడ‌త లాక్‌డౌన్ గ‌డువు జూన్ 30తో ముగియ‌నుండగా.. కేంద్రం కీలక ప్రకటన చేసింది. కంటెయిన్‌మెంట్ జోన్లలో జులై 31 వరకు లాక్‌డౌన్ కొనసాగుతుందని స్పష్టం చేసింది. ఇతర జోన్లలో మరిన్ని కార్యకలాపాలకు గ్రీన్ సిగ్నల్ ఇచ్చింది. సోమవారం రాత్రి అన్‌లాక్ 2.0 మార్గదర్శకాలను విడుదల చేసింది.