గవర్నర్‌తో భేటీ అయిన పన్నీర్‌సెల్వం, పళనిసామి

తమిళనాడు ముఖ్యమంత్రి పదవి కోసం పోటీపడుతున్న పళనిసామి, పన్నీర్‌సెల్వం వేర్వేరుగా ఆ రాష్ట్ర ఇంచార్జ్ గవర్నర్ విద్యాసాగర్ రావుతో భేటీ అయ్యారు. రాత్రి 7:30 గంటలకి పళనిసామి, రాత్రి 8:30 గంటలకి పన్నీర్సెల్వం గవర్నర్ని కలిసి ప్రభుత్వ ఏర్పాటుపై ఆయనతో చర్చించారు. ఏఐఏడీఎంకే తరపున గవర్నర్ని కలిసిన వారిలో పళనిసామి, సెంగొట్టియన్, జయకుమార్ ఉన్నారు. తమకి 124 మంది ఎమ్మెల్యేల మద్దతు ఉందని వివరిస్తూ గవర్నర్కి ఓ లేఖ అందజేసిన పళనిసామి తమని ప్రభుత్వం ఏర్పాటుకు ఆహ్వానించాల్సిందిగా ఆయనను కోరారు. గవర్నర్‌తో భేటీ అనంతరం మీడియాతో మాట్లాడిన పళనిసామి... గవర్నర్ నుంచి త్వరలోనే ఆహ్వానం వస్తుందని ఆశిస్తున్నామని తెలిపారు.

రాత్రి 9:05 గంటల ప్రాంతంలో గవర్నర్ తో పన్నీర్ సెల్వం భేటీ ముగిసింది. భేటీ అనంతరం బయటికి వచ్చిన పన్నీర్‌సెల్వం మీడియాతో మాట్లాడకుండానే తన ఎమ్మెల్యే బృందంతో కలిసి నేరుగా తన నివాసానికి వెళ్లిపోయారు. అయితే, పన్నీర్‌సెల్వం మొదటి నుంచీ చెబుతూ వస్తున్నట్టుగానే తనకి ళ అవకాశం ఇస్తే, అసెంబ్లీలో తనకున్న మద్దతు నిరూపించుకుంటానని గవర్నర్‌ని కోరినట్టు పన్నీర్ వర్గాల ద్వారా తెలుస్తోంది.

వేర్వేరుగా జరిగిన సమావేశాల్లో ఆ ఇద్దరి వాదనలు విన్న గవర్నర్ ఎటువంటి నిర్ణయం తీసుకుంటారనేది తెలియాల్సి వుంది. పళనిసామి కోరినట్టుగా నేరుగా ఆయనకి ప్రభుత్వం ఏర్పాటు చేసేందుకు ఆహ్వానిస్తారా లేక పన్నీర్ సెల్వం కోరుతున్నట్టుగా అతడికి ఓ అవకాశం కల్పిస్తారా అనేది ప్రస్తుతం సస్పెన్స్‌గా మారింది.

వాస్తవానికి పన్నీర్‌సెల్వం వెంట ప్రస్తుతం 8 మంది ఎమ్మెల్యేలే వున్నారు. అయితే, మిగతా ఏఐఏడీఎంకే ఎమ్మెల్యేలని ఆ పార్టీ స్వేచ్ఛగా విడిచిపెడితే, వారు కూడా తనకే మద్దతు పలుకుతారని విశ్వాసం వ్యక్తంచేస్తున్నారు పన్నీర్‌సెల్వం.