సచిన్ కుమార్తె పేరుతో ఫేక్ ట్విట్టర్ ఐడీ.. సాఫ్ట్‌వేర్ ఉద్యోగి అరెస్ట్

సచిన్ టెండూల్కర్ కుమార్తె సారా టెండూల్కర్ పేరిట నకిలీ ట్విట్టర్ ఖాతా తెరవడమే కాకుండా.. దాని ద్వారా ఎన్సీపీ అధినేత శరద్ పవార్‌పై అసభ్యకర ట్వీట్లు చేసిన సాఫ్ట్‌వేర్ ఉద్యో్గిని ముంబై పోలీసులు అరెస్టు చేశారు. అతని వద్ద నుంచి ఒక ల్యాప్‌టాప్, రెండు స్మార్ట్‌ఫోన్లు, ఒక రౌటర్, ఇతర కంప్యూటర్ పరికరాలను సైబర్ పోలీసులు స్వాధీనం చేసుకున్నారు. నిందితుడిని నితిన్ సిశోడే (39)గా పోలీసులు గుర్తించారు. అంధేరీలోని మారోల్‌లో ఉన్న మిలటరీ రోడ్‌లో అతను నివాసముంటున్నట్లు పోలీసులు తెలిపారు.

భారత నేరశిక్షా స్మృతిలోని మోసం, పరువు నష్టం.. అలాగే ఐటీ యాక్ట్ కింద నితిన్‌పై పోలీసులు కేసులు నమోదు చేశారు. కోర్టు నిందితుడిని ఫిబ్రవరి 9 వరకు పోలీస్ కస్టడీకి అప్పగించింది. సచిన్ టెండూల్కర్ వ్యక్తిగత సహాయకుడు సైబర్ పోలీసులకు ఫిర్యాదు చేయడంతో నితిన్ బండారం బయటపడింది. ప్రస్తుతం సారా లండన్‌లో చదువుకుంటోంది. తన పేరిట ఫేక్ ట్విట్టర్ ఐడీ క్రియేట్ చేయడంతో పాటు దానిలో అసభ్యకర పదజాలంతో ట్వీట్లు చేయడంతో ఆమె తండ్రి సచిన్‌కు ఫిర్యాదు చేసింది. దీంతో సచిన్ పర్సనల్ అసిస్టెంట్ పోలీసులకు ఫిర్యాదు చేశారు.

వాస్తవానికి సారా టెండూల్కర్‌కు ట్విట్టర్ అకౌంట్ లేదని, ఆమెకు రాజకీయాలంటే ఆసక్తి కూడా లేదని పోలీసులు నిర్ధారించుకున్నారు. సారా పేరిట ఉన్న ట్విట్టర్ అకౌంట్ ద్వారా శరద్ పవార్‌పై తీవ్ర వ్యాఖ్యలు చేస్తు్న్నారని, చాలా మంది ఆ ట్వీట్లకు స్పందిస్తున్నారని పోలీసులు గుర్తించారు. దీంతో ఐపీ అడ్రస్‌ను ట్రేస్ చేసిన సైబర్ పోలీసులు అది అంధేరీలో ఉన్నట్లు గ్రహించారు. నితిన్ వైఫై రౌటర్ ఐపీ నుంచే ట్వీట్లు చేస్తున్నట్లు గర్తించి అతన్ని అరెస్టు చేశారు.

అయితే నితిన్ న్యాయవాది మాత్రం తన క్లైంట్ అమాయకుడు అని అంటున్నారు. ‘నా క్లైంట్ సెకెండ్ హ్యాండ్ కంప్యూటర్లు, ల్యాప్‌టాప్‌లు క్రయవిక్రయాలు చేస్తుంటారు. కాబట్టి ఇతన్ని నుంచి ల్యాప్‌టాప్‌ను కొనుగోలు చేసిన ఎవరో ఈ పని చేసుండొచ్చు’ అని వాదించారు. కానీ పోలీసులు మాత్రం లాయర్ చెప్పేవి అసత్యాలని కొట్టిపారేసారు.