మోదీతో సచిన్ ముచ్చట్లు!

ఆటతీరుతోనే కాకుండా వ్యక్తిత్వంతోనూ ప్రపంచ వ్యాప్తంగా అభిమానులను సంపాదించుకున్న క్రికెటర్ సచిన్ టెండూల్కర్. ఆయన ఇవాళ (మే 19) ప్రధాని నరేంద్ర మోదీని కలిశారు. తన జీవితం ఆధారంగా రూపొందిస్తున్న సినిమా ‘సచిన్‌: ఏ బిలియన్‌ డ్రీమ్స్‌’ గురించి ఆయన మోదీకి వివరించారు. క్రికెట్లో దేవుడిగా భావించే సచిన్.. ఈ సినిమాతో తన కెరీర్‌ గురించే కాకుండా అంజలితో ప్రణయ గాథ గురించి కూడా తెలుసుకుంటారని చెప్పిన విషయం తెలిసిందే. ఓ టీవీ చానల్‌తో మాట్లాడుతూ.. ‘ఈ సినిమాలో నా జీవితంలోని ప్రణయ గాథను కూడా మీరు చూస్తారు. నా క్రీడా ప్రస్థానాన్ని మలచడంలో నా భార్య అంజలి కీలక పాత్ర పోషించింది’ అని సచిన్‌ అన్నాడు.

ఈ బయోపిక్‌ ద్వారా వ్యక్తిగత ఆలోచనలు, కొన్ని ముఖ్యమైన సంఘటనల గురించి కూడా పంచుకోవాలని అనుకుంటున్నానని సచిన్ తెలిపాడు. మే 26న ప్రేక్షకుల ముందుకు వస్తున్న ‘సచిన్‌’ సినిమా ట్రైలర్‌ ఇప్పటికే అభిమానులను విపరీతంగా అకట్టుకుంటోంది.

అంతర్జాతీయ క్రికెట్‌లో శతక శతకాల రికార్డు నెలకొల్పిన ఏకైక క్రికెటర్‌ సచిన్‌ జీవితం గురించి తెలుసుకోవడానికి యావత్ ప్రపంచం ఆసక్తిగా ఎదురు చూస్తోంది. జేమ్స్‌ ఎర్క్‌సైన్‌ దర్శకత్వంలో తెరకెక్కిన ఈ సినిమాకు స్వర మాంత్రికుడు ఏఆర్‌ రెహమాన్‌ మ్యూజిక్ సమకూర్చాడు.
Sachin - A Billion Dreams: Official trailer