ఉగ్రదాడిలో అమరులైన ఇద్దరు అధికార్లు

జమ్మూ కశ్మీర్‌లోని సుంజ్వాన్ ఆర్మీ స్థావరంపై శనివారం ఉదయం జైషే మహ్మద్ సంస్థ ఉగ్రవాదులు దాడికి పాల్పడిన విషయం తెలిసిందే. ఈ ఘటనలో ఇదర్దు ఆర్మీ అధికారులు అమరులయ్యారు. ఉగ్రదాడిలో జూనియర్ కమిషన్డ్ ఆఫీసర్లు, మహ్మద్ అశ్రఫ్ మీర్, మదన్ లాల్ నేలకొరిగారు. తీవ్రంగా గాయపడిన మరో అధికారి ప్రస్తుతం మిటలరీ హాస్పిటల్‌లో చికిత్స పొందుతున్నారు. సైనిక స్థావరంపై ఉదయం 5 గంటల ప్రాంతంలో భారీగా ఆయుధాలు ధరించిన ఐదుగురు తీవ్రవాదులు దాడికి తెగబడ్డారు. జేసీఓ ఆఫీసర్స్ బిల్డింగ్‌లోకి చొరబడ్డ తీవ్రవాదుల మట్టుబెట్టేందుకు సైన్యం తీవ్రంగా పోరాడుతోంది. లోపల దాక్కున్న ముష్కరులను పట్టుకోవడానికి శ్రమిస్తున్నారు. ఉగ్రదాడిలో తీవ్రంగా గాయపడిన ఆర్మీ అధికారి కుమార్తె హాస్పిటల్‌లో చికిత్స పొందుతూ మృతి చెందిన విషయం తెలిసిందే.

శనివారం తెల్లవారుజామున 4.55 గంటల ప్రాంతంలో 36 ఆర్మీ బ్రిగేడ్ క్యాంప్‌పై జైషే మహ్మద్ ఉగ్రవాదులు బాంబులతో దాడిచేసి, కాల్పులు ప్రారంభించారు. జేసీఓ క్వార్టర్స్ సమీపంలోని బంకర్ వద్ద అనుమానాస్పద ఉగ్ర కదలికలను గుర్తించిన సైన్యం వెంటనే అప్రమత్తమై కాల్పులు జరిపిందని జమ్మూ ఐజీపీ ఎస్డీ సింగ్ జమ్వాల్ తెలిపారు. మరోవైపు సైన్యానికి, ఉగ్రవాదులకు మధ్య భీకర కాల్పులు కొనసాగుతున్నాయి.దీంతో ముందు జాగ్రత్త చర్యగా చుట్టుపక్కల పాఠశాలలను మూసివేశారు. ఘటనాస్థలికి 500 మీటర్లలోపు పాఠశాలలను మూసివేయాలని అధికారులు ఆదేశాలు జారీచేశారు. ఉగ్రవాదులతో పోరాటానికి అదనపు బలగాలను రప్పించారు. సుంజ్వాన్ చేరుకున్న ఆర్మీ ప్రత్యేక దళాలు, ఎస్ఓసీ సైన్యం ఆ ప్రాంతంలో ఉగ్రవాదుల కోసం గాలింపు ముమ్మరం చేశాయి. ఉగ్రదాడిపై కేంద్ర హోమ్ మంత్రి రాజ్‌నాథ్ జమ్మూ కశ్మీర్ డీజీపీతో మాట్లాడి, హోమ్ శాఖ అధికారులకు దిశానిర్దేశం చేశారు.