6 నెలల పసికందును చంపేసిన తల్లి

ఈ సృష్టిలో తల్లి ప్రేమ చాలా గొప్పది. బిడ్డకు చిన్న దెబ్బ తగిలినా తల్లి మనసు విలవిలలాడుతుంది. కాని మహారాష్ట్రలో ఓ మహిళ అమ్మ అనే పదానికి మచ్చ తెచ్చింది. 6 నెలల పసికందును దారుణంగా చంపేసింది. ప్రమాదవశాత్తూ ఘటన జరిగిందంటూ డ్రామాలాడింది. అనుమానంతో పోలీసులు ఆరా తీస్తే.. తానే చంపానని ఒప్పుకుంది. కన్న కొడుకునే హత్య చేయడానికి కారణమేంటని ప్రశ్నించిన పోలీసులు.. ఆమె చెప్పిన సమాధానం విని షాకయ్యారట.

పోలీసులు చెప్పిన వివరాల ప్రకారం.. థానే సమీపంలోని భీవండీకి చెందిన కల్పన గైక్వార్‌కు ఆరు నెలల క్రితం బాబు పుట్టాడు. అయితే కొద్ది రోజులుగా ఆ చిన్నారి అనారోగ్యంతో బాధపడుతున్నాడు. ఏం ఇబ్బందో తెలియదు కాని.. రెండు మూడు రోజులుగా పసివాడు ఊరికే ఏడుస్తున్నాడు. దీంతో కల్పనకు చిరాకు వచ్చింది. కోపంతో ఊగిపోయిన ఆమె.. ఊయలలో ఉన్న కొడుకును తీసుకెళ్లి ఇంటి దగ్గరలో ఉన్న డ్రైనేజీలో పడేసింది. అందులో నీళ్లు ఉండటంతో ఊపిరి ఆడక పాపం పసివాడు ప్రాణాలు విడిచాడు.

కొడుకును దారుణంగా చంపేసిన కల్పన ఏం పాపం తెలియనట్లు నటించింది. పిల్లాడు ప్రమాదవశాత్తూ డ్రైనేజ్‌లో పడిపోయాడని కథ అల్లింది. విషయం తెలుసుకున్న పోలీసులు.. ప్రమాదంగానే భావించి ఈ వ్యవహారాన్ని వదిలేశారు. కాని తర్వాత అనుమానంతో కల్పనను పిలిచి ఆరా తీస్తే.. బిడ్డను చంపినట్లు ఒప్పుకుందట. బిడ్డ పుట్టినప్పటి నుంచి అనారోగ్యంతో ఉన్నాడని.. ఊరికే ఏడుస్తుండంతో విసుగొచ్చి కాలువలో పడేశానని చెప్పిందట. ఆమెపై కేసు నమోదు చేసిన పోలీసులు అరెస్ట్ చేశారు.
Read This Story In Marathi