వివాదాల్లో ఢిల్లీ రహదార్ల పేర్లు!

ఢిల్లీలోని రేస్ కోర్స్ రోడ్‌కు బీజేపీ సిద్ధాంత కర్త పండిత్ దీనదయాళ్ ఉపాధ్యాయ నినాదమైన ‘ఏకాత్మ మార్గ్’ పేరు పెట్టాలని ఆపార్టీ ఎంపీ మీనాక్షి లేఖీ ప్రతిపాదించడంపై విమర్శలు వెల్లువెత్తాయి. సెప్టెంబర్ 9న చేసిన ఆమె ప్రతిపాదినపై బుధవారం కేబినేట్ లో చర్చించనున్నారు. అయితే రోడ్లకు రాజకీయ నేతల పేర్లు, వారి నినాదాలకు బదులుగా, దేశంకోసం ప్రాణాలర్పించిన వీర జవానుల పేర్లు పెట్టి స్మరించుకోవాలని ఢిల్లీ అధికార పార్టీ ఆమ్ ఆద్మీ డిమాండ్ చేస్తోంది. రేస్ కోర్సు రోడ్ లో నివసించిన పరమవీర చక్ర అవార్డు గ్రహీత, అమరవీరుడు వైమానిక లెఫ్టినెంట్ నిర్మల్ జిత్ సింగ్ సికాన్ పేరు పెట్టాలని కంటోన్మెంట్ ఎమ్మెల్యే సురీందర్ సింగ్ డిమాండ్ చేస్తున్నారు. దీనదయాళ్ శతజయంతి ఉత్సవాల సందర్భంగా ఆయన సూచించిన మార్గాలు దేశానికి ఎంతో అవసరమని, ఆయన ప్రవచించిన ‘ఏకాత్మ’ను రేస్ కోర్స్ రోడ్ కు పెట్టడం తామిచ్చే నివాళి అని లేఖి అంటున్నారు. అయితే దీనిపై సురీందర్ సింగ్ మాత్రం మండిపడుతున్నారు. ‘బీజేపీవి డర్టీ పాలిటిక్స్. ఉరీ అమరవీరుల త్యాగాలను గర్తించడం పక్కనబెట్టి రోడ్డును ఏకాత్మ మార్గ్ గా మార్చాలని ప్రయత్నిస్తోంది. ఈరోడ్డులోనే ఎయిర్ ఫోర్స్ స్టేషన్ ఉంది. సికాన్ ఈ రోడ్డులోనే నివాసమున్నారు. ప్రభుత్వాలు, ప్రధానమంత్రులు వస్తారు పోతారు కానీ సికాన్ లాంటి మరొకరు ఉండరు’ అని సింగ్ అన్నారు. గతంలో కాంగ్రెస్ ప్రభుత్వం కూడా ఇలాగే ఈరోడ్డు పేరు మార్చాలని ప్రయత్నించిందని ప్రజలు, భద్రతా దళాల నిరసనతో వెనక్కి తగ్గినట్లు సింగ్ గుర్తు చేశారు. అయితే లేఖీ మాత్రం సింగ్ విమర్శలను తిప్పికొడుతున్నారు. అమరవీరుల త్యాగాలను బీజేపీ ఎప్పటికీ మరిచిపోదని స్పష్టం చేశారు. దీనదయాళ్ ఆదర్శాలు, సిద్ధాంతాలు ఎంతో ఆదర్శవంతమైనవని ఆమె చెబుతున్నారు. కాగా, గత ఆగస్టులో ఔరంగబాద్ రోడ్డుకు దివంగత మాజీ రాష్ట్రపతి అబ్దుల్ కలామ్ మార్గ్ గా మార్చిన సంగతి తెలిసిందే.

When BJP MP Meenakshi Lekhi proposed to rename Race Course Road as Ekatma Marg, the Delhi Cantonment Commando Surinder Singh opposed and demanded that it should be named after martyr Flight Lieutenant Nirmal Jit Singh, a Paramavir Chakra awardee.