Bihar Thief: రైల్లో సెల్ ఫోన్‌ చోరీకి దొంగ యత్నం... ప్రయాణికులు ఏం చేశారో తెలిస్తే హడలే

Bihar Thief: సెల్‌ఫోన్‌ను దొంగలించడానికి ప్రయత్నించి.. ప్రాణాల మీదకు తెచ్చుకున్నాడు. పైగా నరకయాతన అనుభవించాడు. ఎవరి దగ్గర నుంచైతే మొబైల్ ఫోన్ కొట్టేయాలనుకున్నాడో... వాళ్లే అతనికి చుక్కలు చూపించారు. ఈ ఘటన బీహార్‌లో చోటుచేసుకుంది. అక్కడ దొంగతనాలు సహజంగా జరుగుతూ ఉంటాయి. అలాగే ఈ నెల 14వ తేదీన బెగుసరాయ్ నుంచి ఖగారియాకు వెళ్తున్న రైలు సాహెబ్‌పూర్ కమల్ స్టేషన్ నుంచి బయలుదేరింది. అయితే ఒక దొంగ ఆ రైలు బోగి కిటికీ నుంచి ఒక ప్రయాణికుడి మొబైల్‌ ఫోన్‌ను దొంగలించడానికి ప్రయత్నించాడు.

అయితే అప్రమత్తమంగా ఉన్న ప్రయాణికులు ఆ దొంగ చేతులను వెంటనే గట్టిగా పట్టేసుకున్నారు. అయితే అదే సందర్భంలో రైలు వేగం పెరిగింది. దాంతో తనను క్షమించి వదిలేయమని ఆ దొంగ ప్రాధేయపడ్డాడు. కానీ వాళ్లు విడిచిపెట్టలేదు. అలాగే అతని చేతులను గట్టిగా లోపలకు లాగి పట్టుకున్నారు. దాంతో ఆ దొంగ కంపార్ట్‌మెంట్‌ కిటికీ బయటవైపు ప్రమాదకరంగా వేలాడాడు. ఆ రైలు పది కిలో మీటర్ల దూరం ప్రయాణించి ఖగారియా స్టేషన్‌ సమీపిస్తుండగా ఆ దొంగ చేతులను ప్రయాణికులు విడిచిపెట్టారు. దాంతో ఆ దొంగ ఊపిరి పీల్చుకుని.. అక్కడ నుంచి పరుగులు తీశాడు.


ఈ సంఘటనంతా ఆ రైల్లో ఉన్న మరికొందరు తమ మొబైల్ ఫోన్లలో వీడియో తీశారు. ఆ వీడియో సోషల్ మీడియాలో వైరల్ అవుతుంది. అయితే దీనిపై పోలీసులు ఏమైనా చర్యలు తీసుకున్నారా..? లేదా..? అనేది ఇంకా తెలియలేదు. కాగా గత జూన్‌ నెలలో ఇదే విధంగా కదులుతున్న రైలులో ఓ ప్రమాదకరమైన ఘటన చోటుచేసుకుంది. ట్రైన్ డోరు దగ్గర నిలబడి ఉన్న ఆర్తి కుమారి అనే పోలీస్ కానిస్టేబుల్‌ను దొంగలు ఆమెను బయటకు లాగారు. తీవ్రంగా కొట్టారు. ఆమె వారిని తీవ్ర ప్రతిఘటించింది. ఈ ఘటనలో ఆమెకు తీవ్ర గాయాలయ్యాయి.

Read Also: అప్పనంగా వచ్చిపడ్డ కోట్లాది రూపాయలు.. వ్యక్తి అకౌంట్‌లో రూ.12 వేల కోట్లు