93 ఏళ్ల వస్తాద్.. కుస్తీకి సిద్ధమా

వయసు కేవలం ఓ అంకె మాత్రమే.. నిజమే కదూ. కొందరు సీనియర్ సిటిజన్లు చూస్తున్నప్పుడు అలాగే అనిపిస్తుంది. వయసు మీదపడినా బాగా యాక్టివ్‌గా ఉంటుంటారు. సెంచరీకి దగ్గరపడుతున్నా.. యువతలా చెంగు, చెంగున తిరుగుతుంటారు. అదే 93 ఏళ్ల వయసులో ఓ పెద్దాయన కుస్తీలు పడుతున్నారంటే నమ్మగలుగుతారా. నిజంగానే.. ఓ పెద్దాయన సెంచరీకి దగ్గరపడుతున్నా.. కుస్తీ పట్లతో కుర్రాళ్లకు సవాల్ విసురుతున్నారు.

తమిళనాడులోని మధురైకి చెందిన పళని అనే పెద్దాయనకు 93 ఏళ్లు. కుస్తీ (రెజ్లింగ్) అంటే ఇష్టం చిన్నప్పట్నుంచి అదే ఊపిరిగా భావిస్తున్నారు. యువకులకు కుస్తీపట్లు నేర్పిస్తూ.. శిక్షణ ఇస్తున్నాడు. సొంత ఖర్చులతో 1944 నుంచి ఇప్పటి వరకు ఎంతోమందికి కుస్తీలో శిక్షణ ఇచ్చాడు. ఇప్పుడు ఆయన వయసు 93 ఏళ్లు అయినా సరే ఏమాత్రం వెనక్కు తగ్గడం లేదు.

వయసుతో పనిలేదు.. ఓపికుండాలే కానీ అంటున్నారు పళని. తాను పుష్టిగా ఉంటూ.. తన దగ్గర శిక్షణకు వచ్చే యువకుల్ని స్ఫూర్తి నింపుతున్నానంటున్నాడు. తనకు వచ్చిన కుస్తీని రాబోయే తరాలకు అందించడమే తన లక్ష్యమంటున్నాడు. మొత్తానికి లేటు వయసులోను యువకులకు సవాల్ విసురుతూ.. కుస్తీకి రెడీ అంటున్నారు ఈ 93 ఏళ్ల వస్తాద్.