పాడుబడ్డ బావిలో వేలాది ఆధార్‌ కార్డులు..!

మహారాష్ట్ర‌లో... ఒక పాడుబడ్డ బావిలో వేలాది ఒరిజినల్‌ ఆధార్‌ కార్డులు లభ్యమైన ఘటన కలకలం రేపింది. యవత్మల్‌లోని షిండేనగర్‌ ప్రాంతంలో ఈ ఘటన వెలుగులోకొచ్చింది. వివరాల్లోకి వెళితే.. తాగునీటి కొరత ఉన్న నేప‌థ్యంలో స‌ద‌రు బావిని బాగు చేసుకోవాల‌ని ఆ గ్రామ యువ‌కులు నిర్ణ‌యించుకున్నారు. ఈ విష‌యం గురించి తెలుసుకున్న ఆ జిల్లా కలెక్టర్‌ రాజేశ్ దేశ్‌ముఖ్‌తో పాటు కొంతమంది ఎన్‌‌జీవోలు బావి నుంచి చెత్తను తొలగించేందుకు అక్క‌డికి వ‌చ్చారు. ఈ క్రమంలో వారికి వేలాది ఆధార్ కార్డులు బావిలో కనిపించాయి.

నైలాన్ గోనె సంచుల్లో ఆధార్ కార్డుల‌ను ప్యాక్ చేసి, వాటిని రాళ్ల‌తో కట్టి ఆ బావిలో పారేసిన‌ట్లు గుర్తించారు. ఈ ఘ‌ట‌న‌పై అధికారులు దర్యాప్తు కోసం ఓ కమిటినీ ఏర్పాటు చేశారు. ఈ ఘ‌ట‌న‌కు పాల్ప‌డిన వారిపై కఠిన చర్యలు తీసుకుంటామని జిల్లా ఉన్నతాధికారులు తెలిపారు.

కేంద్ర ప్రభుత్వం అనేక పథకాలకు ఆధార్ కార్డును బ్యాంకులతో అనుసందానం తప్పనిసరి చేసిన సంగతి తెలిసిందే. ఈ నేపథ్యంలో ఇలాంటి సంఘటన బయటపడటం సంచలనంగా మారింది.