రైతులకు సాయం చేసేందుకు వచ్చి సజీవదహనం.. తీవ్ర విషాదం

కేంద్ర ప్రభుత్వం తీసుకొచ్చిన నూతన వ్యవసాయ చట్టాలకు వ్యతిరేకంగా రైతులు చేపట్టిన నిరసనలో తీవ్ర విషాదం చోటు చేసుకుంది. ఆందోళనకు మద్దతు తెలిపి, రైతులకు సాయం చేస్తూ వారితోనే ఉన్న ఓ వ్యక్తి కారులో నిద్రిస్తూ.. ప్రమాదానికి గురై సజీవ దహనమయ్యాడు. ఈ ఘటన రైతులతో పాటు పలువురిని కంటతడి పెట్టిస్తోంది.

పంజాబ్‌కు చెందిన వేలాది మంది రైతులు ఢిల్లీ సరిహద్దులో 4 రోజులుగా ఆందోళన (Farmers Protest) నిర్వహిస్తున్నారు. నిరసనలో పాల్గొనేందుకు వచ్చిన అనేక మంది రైతులు వారి ట్రాక్టర్లను కూడా తీసుకొచ్చారు. తమ ట్రాక్టర్లతో పాటు ఢిల్లీ వైపు కదులుతున్నారు. అయితే.. ఆ ట్రాక్టర్లకు ఏవైనా రిపేర్లు వస్తే స్వచ్ఛందంగా చేసేందుకు పంజాబ్‌కు చెందిన జనక్‌ రాజ్‌ (55) అనే వ్యక్తి ముందుకొచ్చారు. రైతులతో పాటే ఢిల్లీ వైపు వచ్చారు.

ఢిల్లీ వైపు ర్యాలీగా వస్తున్న రైతులను హర్యానా సరిహద్దులోని బహదుర్‌ఘర్‌ ప్రాంతంలో పోలీసులు అడ్డుకున్నారు. ఆ రైతులతో కలిసి వచ్చిన జనక్ రాజ్‌ వారితో పాటు అక్కడే ఉన్నారు. శనివారం సాయంత్రం కొన్ని ట్రాక్టర్లకు రిపేర్లు చేసిన అనంతరం రాత్రి కారులో నిద్రించారు. అయితే.. అర్ధరాత్రి తర్వాత ప్రమాదవశాత్తు ఆ కారుకు నిప్పంటుకుంది. దీంతో జనక్‌ రాజ్‌ ఆ కారులోనే అగ్నికి ఆహుతయ్యారు.


జనక్‌ రాజ్‌ మృతిపై శిరోమణి అకాళీదల్ ఎంపీ, మాజీ మంత్రి హర్‌సిమ్రన్‌కౌర్‌ బాదల్‌ దిగ్భ్రాంతి వ్యక్తం చేశారు. ఆ ఘటన తనను ఎంతగానో కలచివేసిందని పేర్కొన్నారు. రైతు ఉద్యమ చరిత్రలో జనక్‌ రాజ్‌ పేరు చిరస్థాయిలో నిలిచిపోతుందంటూ ట్వీట్ చేశారు. జనక్‌ రాజ్‌ మృతి పట్ల వ్యవసాయ సంఘాలు విచారం వ్యక్తం చేశాయి.

Also Read: దేశానికి అన్నం పెట్టే రైతు కష్టం చూసి ఫ్రీగా భోజనం పెడుతున్న దాబా

Don't Miss: పులి దాడి: నాడు యువకుడిని, నేడు యువతిని.. అదే రీతిలో; ఆసిఫాబాద్‌లో విషాదం