అనైతిక టీవీ ఛానెళ్లకు ట్రాయ్ చెంపపెట్టు!

రేటింగ్‌ల కోసం చిల్లర పనులు చేస్తున్న టీవీ ఛానెళ్లపై ట్రాయ్ (టెలికమ్ రెగ్యులేటరీ అథారిటీ ఆఫ్ ఇండియా) కొరడా ఝలిపించింది. టీవీ రేటింగ్స్ విషయంలో మల్టిపుల్ ఎల్‌సీఎన్స్ (లాజికల్ ఛానెల్ నంబర్స్)ను తప్పనిసరి చేస్తూ.. నిబంధన విధించింది. ఈ అంశాన్ని ట్రాయ్ దృష్టికి తీసుకెళ్లిన ఎన్‌బీఏ (న్యూస్ బ్రాడ్‌కాస్టర్స్ అసోసియేషన్) రేటింగ్‌ల కోసం కొన్ని టీవీ ఛానెళ్లు సాగిస్తున్న అక్రమాలను అడ్డుకోవడం దిశగా తొలి విజయం సాధించింది. ప్రముఖ న్యూస్ ఎడిటర్ ఆర్నాబ్ గోస్వామి ఆధ్వర్యంలో ఇటీవల ప్రారంభమైన ‘రిపబ్లిక్ టీవీ’ అనైతిక డిస్ట్రిబ్యూషన్ విధానాలతో రేటింగ్‌లను పెంచుకునే ప్రయత్నం చేస్తోదంటూ ఎన్‌బీఏ ఇటీవల ట్రాయ్‌కు ఫిర్యాదు చేసిన విషయం తెలిసిందే.

2017వ సంవత్సరం 19వ వారానికి సంబంధించిన సమాచారాన్ని అందించకుండా నిలిపివేయాలంటూ బార్క్ (బ్రాడ్‌కాస్ట్ ఆడియన్స్ రీసెర్చ్ కౌన్సిల్)ను కూడా ఎన్‌బీఏ ఆశ్రయించింది. రిపబ్లిక్ టీవీ అవినీతి, అనైతికతతో కూడిన ఎత్తుగడలతో రేటింగ్ సాధించడానికి చేసిన ప్రయత్నాలను ఎన్‌బీఏ ఎండగట్టింది. ఇదే సమయంలో ఎన్‌బీఏ ప్రసారాలకు ట్రాయ్ క్లీన్‌చీట్ ఇచ్చింది.

ట్రాయ్ తాజా చర్యల తర్వాత రిపబ్లిక్ టీవీ ఛానెల్ రేటింగ్ సగానికి పైగా పడిపోవడం గమనార్హం. ఆ టీవీ ఛానెల్ అనైతికతకు ఇదే పెద్ద ఉదాహరణ. తన చర్యల ద్వారా ఛానెళ్ల అనైతికతను అడ్డుకున్నందుకు గాను ట్రాయ్‌కు ఎన్‌బీఏ కృత‌జ్ఞ‌త‌లు తెలిపింది.
Read this in English