పెళ్లి, విడాకులపై కొత్త చట్టం తెస్తాం: కేంద్రం

రాజ్యాంగ విరుద్దమైన తలాక్ ను రద్దు చేస్తే ముస్లిం పెళ్లిళ్లు, విడాకుల సమస్యలను పరిష్కరించడానికి కొత్త చట్టాన్ని రూపొందించడానికి సిద్ధంగా ఉన్నట్లు కేంద్రప్రభుత్వం తెలిపింది. మూడు సార్లు తలాక్ అంటూ ముస్లిం మహిళలకు విడాకులిచ్చే అంశంపై సుప్రీంకోర్టు విచారణ జరుపుతోంది. తలాక్ పై వివిధ వర్గాల వాదనలు వింటున్న సర్వోన్నత న్యాయస్థానం తలాక్ రద్దు చేస్తే.. పెళ్లి..విడాకులలో తలెత్తే సమస్యల పరిష్కారానికి ఎలాంటి చర్యలు తీసుకోబోతున్నారని చీఫ్ జస్టీస్ ఖెహర్ కేంద్ర ప్రభుత్వం తరపున వాదిస్తున్న అటార్నీ జనరల్ ముకుల్ రోహత్గీని ప్రశ్నించారు.

తలాక్ చెల్లదని సుప్రీంకోర్టు కొట్టివేస్తే..ముస్లిం వర్గాల్లోని పెళ్లి, విడాకుల విషయంలో తలెత్తే సమస్యల పరిష్కారానికి కేంద్రం కొత్త చట్టం రూపొందిస్తుందని రోహత్గీ ఐదురుగు సభ్యులుగల ధర్మాసనానికి సమాధానమిచ్చారు.

అదే సమయంలో ప్రస్తుతం తాము తలాక్ పై విచారణ చేస్తున్నామని... బాహుభార్యత్వం, నిఖా హలాలా వంటి అంశాల జోలికి పోవడం సుప్రీంకోర్టు స్పష్టం చేసింది. వివిధ కేసులు పెండింగ్ లో ఉన్న దృష్ట్యా ఆ రెండు అంశాలను పక్కనబెట్టామని తెలిపింది.