రెండు బస్సులు ఢీ.. ఎగిరిపడ్డ డ్రైవర్.. లైవ్ వీడియో

తమిళనాడులోని సేలంలో చోటు చేసుకున్న రోడ్డు ప్రమాదం దృశ్యాలివి. ఈ వీడియో సోషల్ మీడియాలో వైరల్ అవుతోంది. ఓ కాలేజీ బస్సు ఎదురుగా వస్తున్న ప్రైవేట్ బస్సును ఢీకొట్టడంతో ఈ ప్రమాదం జరిగింది. ప్రైవేట్ బస్సు డ్రైవర్ పాటలు వింటూ బస్సు నడుపుతుండగా.. ఒక్కసారిగా ప్రమాదం జరగడంతో డ్రైవర్ సీట్లో నుంచి అమాంతం ఎగిరిపడ్డాడు. డ్రైవర్‌తో పాటు మరికొంత మంది ముందుకు తూలిపడ్డారు. ఇందుకు సంబంధించిన వీడియో వైరల్ అవుతోంది. సేలం జిల్లా శంకరగిరిలోని కోజిపన్నైలో మంగళవారం (మే 17) సాయంత్రం ఈ ఘటన చోటు చేసుకుంది.

ప్రమాద సమయంలో ప్రైవేట్ బస్సులో 30 మంది ప్రయాణికులు ఉండగా.. ప్రైవేట్ కాలేజీకి చెందిన బస్సులో సుమారు 25 మంది విద్యార్థులు ఉన్నారు. ప్రమాదంలో 18 మంది గాయపడ్డారు. క్షతగాత్రుల్లో విద్యార్థులు కూడా ఉన్నారు. అయితే, అందరూ స్వల్ప గాయాలతో బయటపడ్డారని.. ఎవరికీ ఎలాంటి ప్రమాదం లేదని అధికారులు వెల్లడించారు.

‘ప్రమాదం చోటు చేసుకున్న ప్రాంతమంతా కొండలతో కూడుకొని ఉంది. చాలా చోట్ల రోడ్డు మలుపు తిరిగి ఉంటుంది. కాలేజీ బస్సు డ్రైవర్ కొత్తగా చేరినట్లు తెలిసింది. ఆ రూట్లో ఇంతకుముందెన్నడూ డ్రైవింగ్ చేసిన అనుభవం అతడికి లేదు. అందువల్ల అతడు వాహనంపై నియంత్రణ కోల్పోయాడు. దీంతో కాలేజీ బస్సు.. ఎదురుగా వస్తున్న ప్రైవేట్ బస్సును ఢీకొట్టింది’ అని కొంగనపురమ్ పోలీస్ స్టేషన్ అధికారి తెలిపారు. ప్రమాద సమయంలో కాలేజీ బస్సు ఎడప్పాడి వైపు వస్తుండగా.. ప్రైవేట్ బస్సు ప్రయాణికులతో తిరుచెంగోడె వైపు వస్తోంది.

గాయపడిన 18 మందిలో ముగ్గురు తప్ప అందరూ డిశ్చార్జ్ అయ్యి, ఇళ్లకు వెళ్లిపోయారని అధికారులు తెలిపారు. ఘటనపై కేసు నమోదు చేసి దర్యాప్తు చేస్తున్నట్లు పోలీసులు చెప్పారు.

Also Read:

★ చైనా విమానాన్ని పైలట్లే కూల్చేశారా..?

★ పేలిన పెళ్లి కానుక.. చెయ్యిని కోల్పోయిన కొత్త పెళ్లికొడుకు