టీవీ రిమోట్ సెల్ మింగేసిన చిన్నారి.. కాస్త ఆలస్యమైతే!

రెండేళ్ల ఓ చిన్నారి.. టీవీ రిమోట్‌తో ఆడుకుంటూ ఆ రిమోట్‌లోని బ్యాటరీని (TV Remote Cell) మింగేశాడు. కేరళ రాజధాని తిరువనంతపురం నగరంలో ఈ ఘటన చోటు చేసుకుంది. నొప్పితో తల్లడిల్లిన ఆ చిన్నారిని తల్లిదండ్రులు ఆగమేఘాల్లో ఆస్పత్రికి తీసుకెళ్లగా.. వైద్యులు వెంటనే ఎండోస్కోపీ (Endoscopy) ద్వారా కడుపులో నుంచి బ్యాటరీని బయటకు తీశారు. ఏమాత్రం ఆలస్యం జరిగినా బాలుడి ప్రాణాలకు ప్రమాదం జరిగి ఉండేదని తెలిపారు.

తిరువనంతపురం నగర శివార్లలో నివసిస్తున్న దంపతుల రెండేళ్ల కుమారుడు రిషికేశ్‌ ఆడుకుంటూ టీవీ రిమోట్‌లోని బ్యాటరీని మింగేశాడు. అది గమనించిన తల్లిదండ్రులు తొలుత స్థానిక ఆసుపత్రికి తీసుకెళ్లారు. ఆ తర్వాత నిమ్స్ ఆస్పత్రికి తరలించారు. అక్కడి వైద్య సిబ్బంది వెంటనే చిన్నారికి స్కానింగ్ నిర్వహించారు. బాలుడి కడుపులో బ్యాటరీని గుర్తించి వెంటనే ఆపరేషన్‌కు ఏర్పాటు చేశారు.

చిన్నారికి మత్తు మందు ఇచ్చి ఎండోస్కోపీ నిర్వహించి కేవలం 20 నిమిషాల వ్యవధిలోనే బ్యాటరీని బయటకు తీశారు. బాలుడిని సకాలంలో ఆస్పత్రికి తీసుకురావడం, వైద్యులు వెంటనే సర్జరీ చేసి బ్యాటరీని తొలగించడం వల్ల చిన్నారి ప్రాణాలు నిలిచాయని నిమ్స్ ఆస్పత్రి గ్యాస్ట్రోఎంటరాలజిస్ట్ జయకుమార్ తెలిపారు. ఐఎఎన్‌ఎస్‌ ప్రతినిధితో ఆయన మాట్లాడారు.

బాలుడు మింగేసిన టీవీ రిమోట్‌ బ్యాటరీ సెల్ 5 సెంటీమీటర్ల పొడవు, ఒకటిన్నర సెంటీమీటర్ వెడల్పు ఉందని వైద్యులు తెలిపారు. బాలుడు ప్రస్తుతం ఆరోగ్యంగా ఉన్నాడని.. 24 గంటల అబ్జర్వేషన్ తర్వాత డిశ్చార్జ్ చేసి ఇంటికి పంపిస్తామని వెల్లడించారు. చిన్ని చిన్న ఆస్పత్రులను తిప్పుతూ తాత్సారం చేసి ఉంటే, బాలుడి ప్రాణాలకు ముప్పు వాటిల్లి ఉండేదని ఈ సర్జరీలో పాల్గొన్న మరో వైద్యుడు నిహార్‌ అన్నారు.

Casino: ఫోన్‌లో క్యాసినో ఆడి 92 లక్షలు పోగొట్టిన విద్యార్థి.. రైతు కంటతడి
రెండేళ్ల పాపను గోడకేసి కొట్టి చంపిన మహిళ.. ప్రియుడితో సంబంధానికి అడ్డొస్తుందని!
చిలుక కోసం పంచాయితీ.. చివరికి చిలుకే పరిష్కరించింది!
Read Latest National News and Telugu News