హిందీ అర్థం కావడంలేదని ఆత్మహత్య!

హిందీ అర్థం కావడంలేదనే బాధతో ఓ విద్యార్థి ఆత్మహత్య చేసుకున్నాడు. ఈ ఘటన చండీగడ్‌లో చోటు చేసుకుంది. పోస్ట్ గ్రాడ్యూయెట్ ఇనిస్టిట్యూట్ ఆఫ్ మెడికల్ ఎడ్యుకేషన్ అండ్ రీసెర్చ్ (PGIMER)లో పీజీ చేస్తున్న కృష్ణ ప్రశాంత్ ఆర్(24) సోమవారం తన హాస్టల్ గదిలో ఉరివేసుకుని ఆత్మహత్య చేసుకున్నాడు. అక్కడి భాష తనకు అర్థం కావడం లేదని, అక్కడి వాతావరణం తనకు అనుకూలంగా లేదని ప్రశాంత్ చాలా రోజుల నుంచి తమకు చెప్పాడని తల్లిదండ్రులు తెలిపారు.

ఆదివారం తన తల్లి భువనేశ్వరికి ఫోన్ చేసిన ప్రశాంత్ తనకు హిందీ అర్థం కావడంలేదని, తాను ఇంటికి తిరిగి వచ్చేస్తానని చెప్పాడు. మెరిట్‌తో సీటు సాధించిన తర్వాత.. అలా తిరిగి వచ్చేయడం కెరీర్‌కు మంచిది కాదని ప్రశాంత్‌కు సర్ది చెప్పానని, పరిస్థితులు చక్కబడే వరకు వేచి చూడమని కోరానని తల్లి భువనేశ్వరి తెలిపారు. తాము ఇంటికి వచ్చేయమని చెప్పి ఉంటే, తమ కొడుకు కళ్ల ముందు ఉండేవడంటూ ప్రశాంత్ తల్లి కన్నీరు మున్నీరయ్యారు.

కృష్ణ ప్రశాంత్ తల్లిదండ్రులు తమిళనాడులోని రామేశ్వరంలో ఉంటున్నారు. ప్రశాంత్ మరణ వార్త తెలియగానే హుటాహుటిన చండీగడ్‌కు బయల్దేరారు.