బడ్జెట్ పై ‘ముందస్తు‘ ప్రభావం..?

దాదాపు నాలుగు సంవత్సరాల క్రితం ఏర్పడిన ఎన్డీయే సర్కారుకు ఇది చివరి బడ్జెట్. వచ్చే ఏడాది బడ్జెట్ ప్రవేశ పెట్టినా అది ఓట్ ఆన్ అకౌంట్ బడ్జెట్ అవుతుంది. అంతకన్నా ముందుగానే ఎన్నికలు రానున్నాయనే మాట కూడా ఢిల్లీ నుంచి గట్టిగా వినిపిస్తోంది. ఈ రకంగా చూసుకొంటే.. ఇది మోడీ సర్కారుకు చివరి బడ్జెట్టే. మళ్లీ బడ్జెట్ లోపే లోక్ సభకు సార్వత్రిక ఎన్నికలు జరిగే అవకాశాలు కనిపిస్తూ ఉన్నాయి. మరి ఇదే నిజం అయితే.. బడ్జెట్ పై ముందస్తు ఎన్నికల ప్రభావం గట్టిగానే ఉండే అవకాశాలు పుష్కలంగా ఉన్నాయి.

ముందస్తు ఎన్నికలను అరుణ్ జైట్లీ పరిగణనలోకి తీసుకుంటే.. బడ్జెట్ ప్రజారంజకంగా ఉండే అవకాశం ఉంది. కొత్త రకంగా సంక్షేమ పథకాలతో, సబ్సిడీలు, రాయితీలతో మోడీ సర్కారు ప్రజలను ఆకట్టుకునే అవకాశం ఉంది. ప్రత్యేకించి దేశంలోని మెజారిటీ ప్రజలపై, రైతులపై ప్రభావం చూపేలా ఏదైనా పెద్ద సంక్షేమ పథకాన్ని ప్రకటించినా పెద్దగా ఆశ్చర్యపోనక్కర్లేదు.

ఒకవేళ మోడీ సర్కారు ముందస్తు ఎన్నికలకు సిద్ధపడి ఉంటే, ఆ సమాయత్తం బడ్జెట్ తోనే మొదలవ్వాలి. బడ్జెట్ పై ప్రకటనపై ప్రభావం చూపే అంశాలు ఎన్ని ఉన్నా.. ఎన్నికల ప్రభావమే ఎక్కువగా ఉండాలి.

అటు రైల్వే బడ్జెట్ కూడా జనరల్ బడ్జెట్ లో మిళితం అయిపోయింది కాబట్టి.. దేశ ప్రజలందరినీ ఆకట్టుకునే నిర్ణయాలతో బడ్జెట్ ప్రకటన ఉండే అవకాశం ఉంది. అదెలాగో.. మరి కాసేపట్లో స్పష్టత వస్తుంది.