నేను రాజీనామా చేయను, కావాలంటే...! ఉమాభారతి

మంత్రి వర్గ పునర్వ్యవస్థీకరణ కేంద్రంలోని బీజేపీ ప్రభుత్వానికి కొత్త చిక్కులు తెచ్చి పెడుతోంది. తొలిసారి మహారాష్ట్రకు చెందిన ఓ బీజేపీ ఎంపీ ధిక్కార స్వరం వినిపించగా తాజాగా జలవనరుల శాఖ మంత్రి ఉమాభారతి తాను రాజీనామా చేసేది లేదని తేల్చి చెప్పారు. తానైతే రాజీనామా చేయబోనని, కావాలంటే తనను డిస్మిస్ చేసుకోవాలని ఉమ తెగేసి చెప్పినట్లు సమాచారం. మంత్రి వర్గ పునర్వవస్థీకరణలో భాగంగా పనితీరు సక్రమంగా లేని ఎనిమిది మంది మంత్రుల నుంచి బీజేపీ అధ్యక్షుడు అమిత్ షా రాజీనామా కోరినట్లు వినికిడి. ఇందులో సీనియర్ నేత ఉమా భారతి కూడా ఉన్నారు.

మోదీ మానస పుత్రిక నమామి గంగా పథకం అమల్లో ఉమాభారతి పనితీరు సంతృప్తికరంగా లేకపోవడంతో ఆమెను రాజీనామా కోరినట్టు సమాచారం. అయితే తాను రాజీనామా చేసేది లేదని, తనను తొలగించాలనుకుంటే డిస్మిస్ చేయాలని అధిష్ఠానానికి ఉమ స్పష్టం చేసినట్లు భోగట్టా. దీంతో ఉమా భారతి విషయంలో ఏం చేయాలనే విషయంలో అధిష్ఠానం సందిగ్ధంలో పడింది. అయితే తనను రాజీనామా చేయాలని ఏవరూ కోరలేదని, ఈ విషయం గురించి పార్టీ నుంచి ఎలాంటి సమాచారం లేదని ఉమాభారతి ట్విట్టర్‌ ద్వారా పేర్కొన్నారు. ఎన్నికలకు మరో ఏడాదిన్నర మాత్రమే గడువు ఉండటంతో గెలుపు గుర్రాలకు తన క్యాబినెట్‌లో చోటు కల్పించడానికి ప్రధాని పెద్దపీఠ వేశారు. మరోవైపు స్వతంత్రులుగా ఉన్న నిర్మలా సీతారామన్, పీయూష్ గోయల్, ధర్మేంద్ర ప్రధాన్. ముక్తార్ అబ్బాస్ నఖ్వీలకు క్యాబినెట్ హోదా కల్పించారు.