ఇదిగో సబ్బు, సీఎం వస్తున్నారు స్నానం చేయండి!

‘సీఎం వస్తున్నారు.. మీరంతా (దళితులు) స్నానాలు చేయండి. ఇవిగో సబ్బులు, షాంపూలు. స్నానం చేశాక.. అత్తరు కూడా పూసుకోండి. సీఎంగారి ముందు మీరంతా నీట్ గా కనిపించాలి’.. ఈ మాటలు ఉత్తర్ ప్రదేశ్ అధికారులు..కుషి నగర్ ముషహరుల (దళితులు)తో చెప్పిన మాటలు. అంతేకాదు.. అన్నట్లుగానే అందరూ స్నానాలు చేయాలని సబ్బులు, షాంపూలు అందజేశారు.

మొన్న శుక్రవారం ఇక్కడ ఓ కార్యక్రమాల్లో పాల్గొనేందుకు సీఎం యోగి ఆదిత్యనాథ్ వచ్చిన సందర్భంగా స్థానిక అధికారుల నిర్వాకం ఇది. తమను స్నానాలు చేయాలని సబ్బులు, షాంపూలు ఇచ్చారని దళిత మహిళలు వాటిని చూపిస్తూ వాపోయారు. అంతేకాదు.. అత్తరు కూడా రాసుకోవాలంటూ మగవారు చెప్పారు.

అధికారులు దళితులకు అందజేసిన వాటిలో వాషింగ్ పౌడర్ ప్యాకెట్లు కూడా ఉన్నాయి.

ఈ సంఘటన పట్ల సర్వత్రా విమర్శలు వెల్లువెత్తుతున్నాయి. ‘యోగి సీఎం ఉన్న చోట పేద ప్రజలను ఆయన ఈ విధంగా అవమానించారు. పేదల ఏరియాల్లో పర్యటించే సమయంలో వాళ్ల కష్టాలను చూడాలని’ ఆర్జేడీ చీఫ్ లాలూ ప్రసాద్ యాదవ్ విమర్శించారు.

ఇటీవల జమ్ముకశ్మీర్ సరిహద్దుల్లో యూపీకి చెందిన ప్రేమ్ సాగర్ ను పాక్ మూకలు హతమార్చాయి. ఆయన కుటుంబ సభ్యులను సీఎం యోగి సందర్శించినప్పుడు ఆయన ఇంట్లో అధికారులు తాత్కాలికంగా సోఫాలు, టేబుళ్లు, కార్పెట్లు ఏర్పాటు చేశారు. యోగి అక్కడి నుంచి వెళ్లిపోగానే ఆ ‘ఏర్పాట్ల’ను అధికారులు తొలగించారు. ఈ సంఘటపై కూడా విమర్శలొచ్చాయి.