కమలం పూల డ్రెస్‌తో మెలనియా ట్రంప్.. బీజేపీకి సపోర్ట్‌?

అమెరికా అధ్యక్షుడి భారత పర్యటన సందర్భంగా అందరి చూపు ఇరు దేశాల మధ్య జరిగే ఒప్పందాల మీద ఉండగా.. మెలనియా ట్రంప్, ఇవాంకా వస్త్రధారణపైనా చర్చలు జరుగుతున్నాయి. తొలి రోజు ఇవాంకా రూ.1.5 లక్షల విలువైన డ్రెస్ వేసుకోగా.. రెండో రోజు మెలనియా ట్రంప్ ధరించిన డ్రెస్ అందర్నీ ఆకర్షించింది. తెల్లటి కాటన్ డ్రెస్ మీద రంగు రంగుల పూలతో ఉన్న డ్రెస్‌ను ఆమె ధరించారు. రాష్ట్రపతి భవన్‌కు, ఢిల్లీ పాఠశాల సందర్శనకు వెళ్లిన సందర్భంగా ఆమె ఆ డ్రెస్ ధరించారు.

గతంలో మోడల్‌గా పని చేసిన మెలనియా ఈ డ్రెస్‌లో చాలా అందంగా కనిపించారు. భారత సంప్రదాయనికి దగ్గరగా ఉండే పూల డ్రెస్‌ను ఆమె ధరించారు. ఆమె ధరించిన డ్రెస్ మీద గులాబీ, కాషాయం, బ్లూ కలర్స్‌లోని ఎంబ్రాయిడరీ తామర పూల గుర్తులు ఉండటం గమనార్హం. ఈ కాటన్ పాపు‌లిన్ షర్ట్ డ్రెస్‌ను ప్రముఖ డిజైనర్ కరోలినా హెర్రెరా రూపొందించారు. ఈ డ్రెస్ విలువ రూ.1,15,265.

కమలం పువ్వు భారత జాతీయ పుష్పం. ఇది బీజేపీ చిహ్నం కూడా అనే సంగతి తెలిసిందే. తామర పువ్వు జాతీయ చిహ్నం కాబట్టి మన దేశంపై ఉన్న ప్రేమతో ఆమె ఈ డ్రెస్ వేసుకున్నారా? లేదంటే బీజేపీ కోసం ఫ్లోటస్ లోటస్ సింబల్ ఉన్న డ్రెస్ వేసుకున్నారా? అనేది ఆసక్తికరంగా మారింది.
ఎవరు ఏమనుకుంటున్నారు అనేది పక్కనబెడితే.. ఢిల్లీలో ఎండ వేడిమిని తట్టుకోవడం కోసం ఆమె తెల్లటి దుస్తులు ధరించారని భావిస్తున్నారు. మెలనియా డ్రెస్‌ను ప్రధాని మోదీ కచ్చితంగా ప్రశంసించి ఉంటారు కదూ.