ఎగ్జిట్ పోల్: ఉత్తరాఖండ్‌లో చరిత్ర రిపీట్?

రానున్న ఎన్నికల ఫలితాలు మంచు కొండల్లోనూ వేడి పుట్టించనున్నాయా? ఔననే అంటున్నాయ్... ఎగ్జిట్ పోల్ ఫలితాలు. సరిగ్గా 2012లో ఏం జరిగిందో.. అదీ సీన్ మళ్లీ ఇక్కడ రిపీట్ అయ్యే అవకాశాలు లేకపోలేదని ఎగ్జిట్ పోల్ గణంకాలు చూస్తే తెలుస్తోంది. అయితే, ఇది ఎంత వరకు వాస్తవమనేది 11న విడుదలయ్యే ఫలితాలే తేల్చుతాయి.

ఉత్తరాఖండ్ 2012 విధాన సభ ఎన్నికల్లో బీజేపీకి 31, కాంగ్రెస్‌కు 32 సీట్లు లభించాయి. సి-ఓటర్ ఎగ్జిట్ పోల్ అంచనాల ప్రకారం.. మొత్తం 70 సీట్లలో బీజేపీ, కాంగ్రెస్‌లకు చెరో 32 సీట్లు, ఇతరులకు 6 సీట్లు లభించనున్నాయి. అయితే, ఫిబ్రవరి 12న కర్నప్రయోగ్ బీఎస్పీ అభ్యర్థి మరణంతో ఎన్నికల కమీషన్ అక్కడ పోలింగ్ రీషెడ్యూల్ చేసింది. ఈ నేపథ్యంలో కేవలం 69 సీట్లకు మాత్రమే ఫలితాలు వెల్లడి కానున్నాయి.

విపత్కర సమయంలో కూడా కాంగ్రెస్‌కు సానుకూలంగా ఫలితాలు ఉండటం ముఖ్యమంత్రి హరీష్ రావత్‌కు ఊరట కల్పించవచ్చు. అయితే, అధికారం కోసం భాజపా ఎమ్మెల్యేలను, ఇతరులను ఆకట్టుకుంటే సీన్ రివర్స్ కావడం ఖాయం. ఉత్తరాఖండ్‌లో మొత్తం 7,220 మందిపై సీ ఓటర్ ఈ ఎగ్జిట్ పోల్ నిర్వహించింది. ఈ నేపథ్యంలో ఎగ్జిట్ పోల్ అంచనాలు ఎంత వరకు నిజం కావచ్చనేది శనివారంతో తేలిపోతుంది.

బీజేపీదే విజయం: టుడేస్ చాణక్య ఎగ్జిట్ పోల్ ఫలితాల ప్రకారం.. బీజేపీ ఉత్తరాఖండ్‌లో విజయం సాధించనుంది. దాదాపు 53 సీట్లు కమలానికి దక్కే అవకాశాలున్నాయి. కాంగ్రెస్‌కు 15, ఇతరులకు 2 సీట్లు లభించవచ్చని అంచనా వేసింది. అలాగే, న్యూస్ ఎక్స్-ఎంఆర్సీ ఫలితాల ప్రకారం.. బీజేపీకి 38, కాంగ్రెస్‌కు 30 సీట్లు, ఇతరులకు 2 సీట్లు లభించవచ్చని అంచనా. ఈ ఫలితాలు బీజేపీ శ్రేణుల్లో ఉత్సాహాన్ని నింపుతున్నాయి.