కొవాగ్జిన్ మూడో దశ ట్రయల్స్ పురోగతిపై భారత్ బయోటెక్ కీలక ప్రకటన

కరోనా వైరస్‌పై పోరాటంలో భాగంగా తాము అభివృద్ధి చేసిన ‘కొవాగ్జిన్‌’వ్యాక్సిన్ మూడో దశ ప్రయోగాల పురోగతిపై భారత్‌ బయోటెక్‌ మంగళవారం ప్రకటన చేసింది. ఇప్పటి వరకు 13వేల మంది వాలంటీర్లను రిక్రూట్ చేసుకుని కొవాగ్జిన్‌ టీకా ఇచ్చినట్టు తెలిపింది. మూడో దశ ట్రయల్స్‌లో 26వేల మందికి టీకా ఇవ్వడమే లక్ష్యంగా పెట్టుకున్నట్టు పేర్కొంది. ఇప్పటి వరకు సగం లక్ష్యం పూర్తి కావడంపై భారత్‌ బయోటెక్‌ హర్షం వ్యక్తం చేసింది.

కరోనా వైరస్‌కు సంబంధించి ముక్కు ద్వారా ఇచ్చే టీకా (నాజల్‌ డ్రాప్స్‌) పైనా భారత్‌ బయోటెక్‌ ప్రయోగాలు చేస్తున్న విషయం తెలిసిందే. ప్రస్తుతం మూడో దశ క్లినికల్ ట్రయల్స్‌లో కొవాగ్జిన్‌ రెండు డోసుల ఇంజెక్టబుల్‌ టీకా. దీన్ని దేశంలోని అందరికీ వేయాలంటే 260 కోట్ల సిరంజ్‌లు, సూదుల అవసరమవుతాయని భారత్‌ బయోటెక్‌ సీఎండీ డాక్టర్‌ కృష్ణా ఎల్లా ఇటీవల తెలిపారు. అందుకే నాజల్‌ డ్రాప్స్‌ వ్యాక్సిన్‌పై తాము దృష్టిసారించినట్టు పేర్కొన్నారు.

కొవాగ్జిన్ మూడో దశ క్లినికల్ ట్రయల్స్ నవంబరు మధ్యలో దేశవ్యాప్తంగా ప్రారంభమయ్యాయి. ‘దేశీయంగా అభివృద్ధి చేసిన మొట్టమొదటి కోవిడ్ -19 వ్యాక్సిన్.. సమర్ధతపై ఇంత పెద్ద సంఖ్యలో మూడో దశ అధ్యయనం నిర్వహిస్తోన్న ఏకైక టీకా.. వ్యాక్సిన్ భద్రత, సమర్ధతపై ఫేజ్ I,ఫేజ్ II క్లినికల్ ట్రయల్స్‌లో పాల్గొన్న దాదాపు 1000 మంది ఫలితాలను అంతర్జాతీయ శాస్త్రీయ పత్రికల అంగీకారంతో అంచనా వేశాం’ తెలిపింది.

మరోవైపు, మూడో దశ క్లినికల్ ట్రయల్స్ కొనసాగుతుండగానే.. టీకా అత్యవసర వినియోగానికి అనుమతి కోరుతూ డ్రగ్స్ కంట్రోలర్ జనరల్ ఆఫ్ ఇండియాకు భారత్ బయోటెక్ దరఖాస్తు చేసింది. దీంతోపాటు ఫైజర్, ఆక్స్‌ఫర్డ్ సంస్థలు కూడా దరఖాస్తు చేశాయి. వీటిపై కేంద్రం ఇంకా ఎటువంటి నిర్ణయం తీసుకోలేదు. కొవాగ్జిన్‌ను భారత వైద్య పరిశోధన మండలి, పుణేలోని నేషనల్ ఇన్‌స్టిట్యూట్ ఆఫ్ వైరాలజీతో సంయుక్తంగా భారత్ బయోటెక్ అభివృద్ధి చేసింది.