స్కూల్స్, ఆఫీసుల్లో వందేమాతరం తప్పనిసరి!

పాఠశాలలు, ప్రభుత్వ కార్యాలయాలు, ప్రైవేట్ సంస్థలు, పరిశ్రమలలో తప్పనిసరిగా వందేమాతర గేయాన్ని ఆలపించాలని మద్రాస్ హైకోర్టు తీర్పు వెలువరించింది. పాఠశాలల్లో కనీసం సోమవారం లేదా శుక్రవారం, అలాగే కార్యాలయాల్లో నెలకు ఒకసారి తప్పనిసరిగా పాడాలని న్యాయమూర్తి ఎంవీ మురళీధరన్ తన తీర్పులో పేర్కొన్నారు. ప్రభుత్వ, ప్రయివేట్ పాఠశాలలు తమ విద్యార్థులతో వారానికి రెండుసార్లు జాతీయ గేయాన్ని ఆలపించేలా చర్యలు తీసుకోవాలని జస్టిస్ మురళీధరన్ ఆదేశించారు. అంతేకాదు ఇతర ప్రభుత్వ, ప్రయివేట్ సంస్థలు కూడా నెలకు ఒకసారైనా వినిపించాలని అన్నారు. బెంగాలీ, సంస్కృతంలో పాడటం కష్టంగా ఉంటే దాన్ని తమిళంలోకి తర్జుమా చేయాలని అన్నారు.

ఎవరైనా పాడలేకపోతే వారిని బలవంతం చేయరాదని, అయితే దీనికి సరైన కారణాలను చూపాలని అన్నారు. యువత రేపటి భవిష్యత్తు కోసం ఆశలు, నమ్మకంతోనే న్యాయస్థానం ఈ నిర్ణయం తీసుకుందని, దీన్ని అమలు చేసి దేశ పౌరులు ఆదర్శంగా నిలవాలని వ్యాఖ్యానించారు. తమిళనాడులో ఇటీవల నిర్వహించిన ఉపాధ్యాయ అర్హత పరీక్షలో వందేమాతరాన్ని ఏ భాషలో రాశారని అడిగిన ప్రశ్నకు కే వీరమణి అనే అభ్యర్థిని బెంగాలీ అని సమాధానం ఇచ్చాడు. అయితే దీనికి సరైన సమాధానం సంస్కృతం. ఈ పరీక్షలో 89 మార్కులు రావడంతో ఒక్క మార్కుతో ఉద్యోగాన్ని అతడు కోల్పోయాడు. దీనికి కారణం వందేమాతరం ప్రశ్నకు సంస్కృతం అని టీచర్ రిక్రూట్‌మెంట్ బోర్డ్ పేర్కోవడమేనంటూ అతడు కోర్టును ఆశ్రయించాడు.

తాను చదివిన పుస్తకాల్లో వందేమాతరాన్ని బెంగాల్‌లోనే తొలుత రాశారని, టీఆర్బీ చేసిన పొరపాటుతో నష్టపోయానని తెలిపాడు. దీనిపై ప్రభుత్వం అఫిడ్‌విట్ దాఖలు చేస్తూ సంస్కృతం నుంచి బెంగాల్‌లో తర్జుమా చేశారని వాదించింది. దీంతో న్యాయమూర్తి సరైన సమాధానం ఏంటో గుర్తించాలని అడ్వకేట్ జనరల్‌కు నిర్దేశించారు. వందేమాతర గేయం అసలైన భాష సంస్కృతం, కానీ దీన్ని బెంగాలీ స్క్రిప్టులో రాశారని జులై 13 న విచారణ సందర్భంగా ఏజీ తెలిపారు. వీరమణిని ఉపాధ్యాయ ఎంపిక ప్రక్రియలో తప్పనిసరిగా పరిగణనలోకి తీసుకోవాలని న్యాయమూర్తి తన తీర్పులో తెలిపారు.