చెన్నై తీరాన్ని తాకిన వార్ధా తుపాను

భయంకర తుపాను ‘వార్ధా’ తమిళనాడులోని చెన్నై తీరాన్ని తాకింది. దీంతో ఈదురు గాలులతో కూడిన భారీ వర్షం నగరాన్ని ముంచెత్తింది. చెన్నై తీరానికి అతి సమీపంలో ఉన్న ఈ వార్ధా తుపాను తీరం దాటే సమయంలో మరింత భయంకరంగా మారనుందని వాతావరణ శాఖ అధికారులు వెల్లడించారు. వార్ధా తీర దాటేటప్పుడు గంటకు 140 కి.మీ. వేగంతో పెను గాలులు వీస్తాయని చెప్పారు. ఇప్పటికే వీస్తున్న ఈదురు గాలులకు చెన్నైలో అనేక చోట్ల చెట్లు నేలకొరిగాయి. చెన్నై బీచ్ రైల్వే స్టేషన్ పైకప్పు ఎగిరిపోయి, రేకులు చెల్లాచెదురుగా పడ్డాయి. కొన్ని ప్రాంతాల్లో పురాతన భవనాలు కుప్ప కూలిపోయాయి.

మరోవైపు తుపాను నేపథ్యంలో చెన్నై అధికారులు ముందస్తు చర్యగా పాఠశాలలు, కళాశాలలకు సెలవులు ప్రకటించారు. ప్రైవేటు సంస్థలు, ఐటీ కంపెనీలు సైతం ఈ రోజు సెలవు ప్రకటించాయి. లోతట్టు ప్రాంతాల్లో విద్యుత్ సరఫరాను నిలిపివేయడంతో పాటు ప్రజలను ఇళ్లలో నుంచి బయటకు రావద్దని హెచ్చరించారు. తీర, లోతట్టు ప్రాంతాల్లోని ప్రజలను సురక్షిత ప్రదేశాలకు తరలిస్తున్నారు. రహదారులపై విద్యుత్ స్తంభాలు, హోర్డింగ్‌లు కూలిపోవడంతో రవాణా వ్యవస్థ పూర్తిగా స్థంభించింది.





ఆంధ్ర, తమిళనాడులని వణికిస్తోన్న 'వార్ధా'.. వార్త కోసం ఇక్కడ క్లిక్‌చేయండి