VD Savarkar మహారాష్ట్రతో సరిహద్దు వివాదం: కర్ణాటక అసెంబ్లీలో సావర్కర్ చిత్రపటం.. కాంగ్రెస్ నిరసన

VD Savarkar కర్ణాటక, మహారాష్ట్రల మధ్య సరిహద్దు వివాదం రోజు రోజుకూ రాజుకుంటోంది. ఈ సమయంలో కర్ణాటక అసెంబ్లీలో వీడీ సావర్కర్‌ చిత్రపటాన్ని అధికార బీజేపీ ఆవిష్కరించింది. దీనిపై ప్రతిపక్ష కాంగ్రెస్ తీవ్ర అభ్యంతరం వ్యక్తం చేస్తోంది. ప్రతిపక్ష నేత సిద్ధరామయ్య సహా కాంగ్రెస్‌ ఎమ్మెల్యేలంతా బీజేపీ ప్రభుత్వ తీరుపై మండిపడుతున్నారు. సావర్కర్‌ చిత్రపటాన్ని తొలగించాలని డిమాండ్‌ చేస్తున్నారు. అంతేకాదు, అసెంబ్లీలో వాల్మీకి, బసవన్న, కనకదాస, బీఆర్‌ అంబేడ్కర్‌, సర్దార్‌ వల్లభాయ్‌ పటేల్‌ లాంటి మహనీయులను చిత్రపటాలను కూడా ఉంచాలని డిమాండ్‌ చేస్తూ స్పీకర్‌కు లేఖ రాశారు. ప్రభుత్వ అవినీతిపై చర్చ నుంచి తప్పించుకోడానే అసెంబ్లీలో సావర్కర్‌ చిత్రపటాన్ని ఏర్పాటు చేసి వివాదం రాజేసిందని కాంగ్రెస్‌ నేతలు దుయ్యబడుతున్నారు. వచ్చే ఏడాది ఏప్రిల్-మే నెలలో అసెంబ్లీ ఎన్నికల జరగనుండగా.. వీర్ సావర్కర్ చిత్రపటాన్ని వ్యూహాత్మకంగానే బీజేపీ ఆవిష్కరించినట్టు తెలుస్తోంది. వీర్ సావర్కర్ గురించి అవగాహన కల్పించేందుకు రాష్ట్రవ్యాప్త ప్రచారంలో భాగంగా హిందూత్వ సిద్ధాంతకర్త చిత్రపటాన్ని ఆవిష్కరించడం ద్వారా మరో అడుగు ముందుకు వేసింది.

పొరుగున మహారాష్ట్రకు చెందిన వీర్ సావర్కర్‌కు బెలగావితోనూ అనుబంధం ఉంది. నాలుగు నెలల పాటు 1950లో బెలగావీలోని హిండల్గా సెంట్రల్ జైల్లో ఉన్నారు. ముంబయిలో అరెస్ట్ వారెంట్ జారీ కావడంతో ఆయన బెలగావీకి వచ్చేయగా.. అక్కడ పోలీసులకు చిక్కారు. పాకిస్థాన్ మాజీ ప్రధాని లియాఖత్ అలీకి వ్యతిరేకంగా ఢిల్లీలో నిరసన తెలపడానికి సిద్ధమైన సావర్కర్‌ను ముందస్తు అరెస్ట్ చేశారు. సావర్కర్ కుటుంబసభ్యులు కోర్టులో పిటిషన్ వేయడం... రాజకీయ కార్యకలాపాలకు దూరంగా ఉంటానని ఆయన బాంబే హైకోర్టులో అఫిడవిట్ దాఖలు చేయడంతో న్యాయస్థానం విడుదలకు ఉత్తర్వులు జారీచేసింది.

శీతకాల అసెంబ్లీ సమావేశాల చివరి విడతను బెళగావీలో నిర్వహించనున్నారు. పది రోజుల పాటు ఈ సమావేశాలు జరగనున్నాయి. అటు, మహారాష్ట్రకు చెందిన శివసేన ఎంపీ ధైర్యశీల్ మానేను బెలగావీలోకి రాకుండా కర్ణాటక అధికారులు నిషేధం విధించారు.


Read Latest National News And Telugu News