ఉపరాష్ట్రపతి వెంకయ్య నాయుడుకి కరోనా పాజిటివ్

ఉపరాష్ట్రపతి వెంకయ్యనాయుడు కరోనా వైరస్ బారినపడ్డారు. ఆయనకు కరోనా పాజిటివ్‌గా నిర్ధారణ అయినట్లు ఉపరాష్ట్రపతి కార్యాలయం మంగళవారం (సెప్టెంబర్ 29) రాత్రి ట్విటర్ ద్వారా వెల్లడించింది. ప్రస్తుతం ఆయన హోమ్ ఐసోలేషన్‌లో ఉన్నట్లు తెలిపారు. ఆయనకు ఎలాంటి లక్షణాలు లేకుండానే కరోనా పాజిటివ్‌గా నిర్ధారణ అయినట్లు తెలిపారు. వెంకయ్య నాయుడు కుటుంబసభ్యులకు కరోనా నెగటివ్‌గా నిర్ధారణ అయినట్లు వెల్లడించారు.

ఉపరాష్ట్రపతి వెంకయ్యనాయుడు మంగళవారం ఉదయం రొటీన్‌గా కరోనా వైరస్ పరీక్షలు చేయించుకున్నారు. ఈ పరీక్షల్లో ఆయనకు పాజిటివ్‌గా వచ్చింది. ఆయన ఆరోగ్యం బాగానే ఉంది. ఆయనకు ఎలాంటి లక్షణాలు లేకుండానే పాజిటివ్‌గా నిర్ధారణ అయింది. వైద్యుల సూచన మేరకు ఆయన ప్రస్తుతం హోమ్ క్వారంటైన్‌లో ఉన్నారు. ఉపరాష్ట్రపతి సతీమణి ఉషా నాయుడుకు కరోనా నెగటివ్‌గా నిర్ధారణ అయింది. ప్రస్తుతం ఆమె సెల్ఫ్ ఐసోలేషన్‌లో ఉన్నారు’ అని ఉపరాష్ట్రపతి కార్యాలయం ట్వీట్ చేసింది.

దేశంలో కరోనా మహమ్మారి సామాన్యుల నుంచి ప్రముఖుల వరకు వణికిస్తోంది. కేంద్రంలో ఇప్పటికే 10 మందికి పైగా మంత్రులు ఈ వైరస్ బారినపడ్డారు. కరోనా బారినపడి కేంద్ర రైల్వే శాఖ సహాయ మంత్రి సురేశ్ అంగడి కన్నుమూశారు. కరోనా సోకిన మంత్రుల్లో హోం మంత్రి అమిత్ షా, వ్యవసాయ శాఖ సహాయ మంత్రి కైలాశ్ చౌదరి, ఆయుష్ మంత్రి శ్రీపాద్ నాయక్, జల్‌శక్తి మంత్రి గజేంద్ర సింగ్ షెకావత్, పార్లమెంటరీ వ్యవహారాల శాఖ మంత్రి అర్జున్ రామ్ మేఘ్‌వాల్, పెట్రోలియం మంత్రి ధర్మేంద్ర ప్రధాన్ ఉన్నారు.

ఆయా రాష్ట్రాల్లో పలువురు ఎంపీలు, మంత్రులు, ఎమ్మెల్యేలు కన్నుమూశారు. ఇటీవల కరోనా బారినపడి అస్తమించిన గాన గంధర్వుడు ఎస్పీ బాలుది, వెంకయ్యనాయుడిది ఒకే ఊరు కావడం గమనార్హం.

Must Read: బాలు మా ఊరి వాడు.. చిన్ననాటి నుంచే ప్రత్యేక అనుబంధం: వెంకయ్య నాయుడు
Also Read: చైనా నుంచి మరో వైరస్ ముప్పు.. ICMR హెచ్చరిక