బీజేపీలో వాలనున్న వాలియా!

దేశ రాజధాని డిల్లీ మున్సిపల్‌ ఎన్నికలకు సిద్ధమవుతున్నవేళ కాంగ్రెస్‌కు ఎదురుదెబ్బలు ప్రారంభమయ్యాయి. తాజాగా ఆ పార్టీ సీనియర్‌ నేత, డిల్లీ మాజీ మంత్రి ఏకే వాలియా కాంగ్రెస్‌ నుంచి వైదొలుగుతున్నట్లు స్పష్టం చేశారు. మున్సిపల్‌ ఎన్నికల టికెట్ల కేటాయింపులపై అసంతృప్తి చెందిన వాలియా పార్టీకి రాజీనామా చేస్తున్నట్లు ప్రకటించారు. కాంగ్రెస్‌ పార్టీ టికెట్లను అమ్ముకుంటోందని ఆయన ఆరోపించారు. ‘పార్టీ కోసం నేను చాలా ఏళ్లుగా పనిచేస్తున్నాను. కానీ.. ఇప్పుడు నా మాట ఎవరూ వినడం లేదు’ అని వాలియా వాపోయారు.

డిల్లీలో షీలా దీక్షిత్‌ ప్రభుత్వ హయాంలో.. వాలియా మంత్రిగా పని చేశారు. వాలియా రాజీనామా కాంగ్రెస్‌పై తీవ్ర ప్రభావాన్ని చూపే అవకాశం ఉందని షీలా దీక్షిత్ అన్నారు. 2015 అసెంబ్లీ ఎన్నికల్లో ఘోర పరాభవం తర్వాత డిల్లీలో కాంగ్రెస్ వ్యవహారాలను అజయ్ మాకెన్‌కు అప్పగించారు. నాటి నుంచి ఆయన.. పార్టీలో షీలా వర్గానికి చెందిన నేతల ప్రాధాన్యాన్ని తగ్గిస్తూ వస్తున్నట్లు విమర్శలున్నాయి.

డిల్లీలో ఏప్రిల్‌ 23న మున్సిపల్ ఎన్నికలు జరగనున్న నేపథ్యంలో.. వాలియా రాజీనామా కాంగ్రెస్‌కు నష్టం చేకూర్చనుంది. తన భవిష్యత్ కార్యాచరణ గురించి వాలియా ఇప్పటివరకూ ఏం చెప్పకపోయినా.. ఆయన బీజేపీలో చేరడానికే మొగ్గు చూపుతున్నట్లు వార్తలు వినిపిస్తున్నాయి. ఉత్తరప్రదేశ్‌లో అసెంబ్లీ ఎన్నికల్లో భారీ విజయం ఇచ్చిన ఉత్సాహంతో.. డిల్లీ మున్సిపాలిటీలోనూ పాగా వేయడానికి బీజేపీకి అవకాశాలు ఎక్కువగా కనిపిస్తున్నాయని.. ఈ నేపథ్యంలో వాలియా.. బీజేపీ గూటికే చేరవచ్చని రాజకీయ విశ్లేషకులు భావిస్తున్నారు. మరికొంత మంది నేతలు కూడా ఆయన బాటలోనే నడవడానికి సిద్ధపడుతున్నట్లు సమాచారం.