సీపీఆర్ చేసి ప్రాణం కాపాడిన IAS అధికారి.. టీవీలో చూసింది గుర్తొచ్చి!

ఇంటి నిర్మాణానికి సంబంధించిన పని కోసం హౌసింగ్ బోర్డు కార్యాలయానికి వచ్చిన ఓ పౌరుడు అకస్మాత్తుగా గుండెపోటుతో కుప్పకూలాడు. కార్యాలయంలో ఉన్న ఓ ఐఏఎస్ అధికారి సత్వరమే స్పందించి అతడికి CPR చేసి ప్రాణాలు నిలబెట్టారు. ప్రస్తుతం బాధితుడు ఆస్పత్రిలో చికిత్స పొందుతున్నారు. చంఢీగర్‌లో చోటు చేసుకున్న ఈ ఘటనకు సంబంధించిన వీడియో వైరల్‌గా మారింది. ఇంత చేసి ప్రాణాలు నిలబెట్టిన ఆ ఐఏఎస్ అధికారికి ఇప్పటివరకు అసలు సీపీఆర్ ఎలా చేయాలో తెలియదు. అయితే, రెండు నెలల కిందట న్యూస్ ఛానెల్‌లో ప్రసారమైన ఓ రియల్ ఘటనకు సంబంధించిన వీడియోను ఆ అధికారి చూశారు. అది గుర్తుకు తెచ్చుకొని బాధితుడికి సీపీఆర్ చేసి ప్రాణం నిలబెట్టారు.

‘నేను సీపీఆర్ చేసిన ప్రక్రియ సరైందో, కాదో నాకు తెలియదు. ఆ సమయంలో నా మనసుకు అనిపించింది నేను చేశాను. ఇతర విషయాలపై సమయాన్ని వృథా చేయడం కంటే, ప్రాణాలను కాపాడేందుకు తక్షణ ప్రయత్నం చేయడం చాలా ముఖ్యం కదా..’ అని ఐఏఎస్ అధికారి యశ్‌పాల్ గార్గ్ అన్నారు. ప్రస్తుతం ఆయన చంఢీగర్ హెల్త్ సెక్రటరీగా వ్యవహరిస్తున్నారు.


చంఢీగర్‌లోని సెక్టార్ 42కు చెందిన జనక్ లాల్ అనే వ్యక్తి మంగళవారం (జనవరి 17) ఉదయం చంఢీగర్ హౌసింగ్ బోర్డు కార్యాలయానికి వచ్చారు. భవనం నిర్మాణ ఉల్లంఘన కేసుకు సంబంధించిన అంశంపై ఆయన CHB కార్యాలయానికి వచ్చారు. వచ్చీ రాగానే ఛాతీ నొప్పితో కుర్చీలో కుప్పకూలిపోయాడు.

‘ఆ సమయంలో నేను నా ఛాంబర్‌లో ఉన్నాను. పబ్లిక్ రిలేషన్స్ డైరెక్టర్ రాజీవ్ తివారీ.. నా ఛాంబర్‌కి పరుగెత్తుకుంటూ వచ్చారు. CHB సెక్రటరీ ఛాంబర్‌లో ఒకరు కుప్పకూలిపోయారని చెప్పారు. నేను వెంటనే అక్కడికి వెళ్లి అతడికి CPR చేశాను’ అని ఐఏఎస్ అధికారి గార్గ్ చెప్పారు.

గార్గ్ సీపీఆర్ చేసిన తర్వాత జనక్ లాల్ కోలుకున్నాడు. అతడిని వెంటనే సమీపంలోని ప్రభుత్వ ఆసుపత్రికి తరలించారు. అక్కడి వైద్య సిబ్బంది అతడికి ECG చేసి, తగిన చికిత్స అందించారు. ప్రస్తుతం అతడు వైద్యుల పర్యవేక్షణలో ఉన్నాడని అధికారులు తెలిపారు.

సీపీఆర్ చేయడానికి తనకుకు ఎలాంటి శిక్షణ లేదని గార్గ్ చెప్పారు. అయితే, ఇటీవల ఒక టీవీ ఛానెల్‌లో వీడియో చూశానని ఆయన చెప్పారు. ‘ఒక రోగి వైద్యుడి వద్దకు వచ్చాడు. డాక్టర్ మందులు రాస్తుండగా.. అతడి ముందు కూర్చున్న రోగి అకస్మాత్తుగా కుర్చీలో కూలబడ్డాడు. అప్పుడు డాక్టర్ రోగి వద్దకు వచ్చి అతడికి CPR నిర్వహించి ప్రాణాలు కాపాడాడు. ఇది సుమారు 2 నెలల కిందట దేశంలో ఎక్కడో జరిగిన యదార్థ ఘటన. ఈ ఘటన నుంచి నేను సీపీఆర్ గురించి తెలుసుకున్నాను. నాకు తెలిసింది చేశాను’ అని యశ్‌పాల్ గార్గ్ వివరించారు. ఆయన చేసిన పనిపై నెటిజన్లు ప్రశంసల వర్షం కురిపిస్తున్నారు.

CPR అంటే..?
గుండెపోటు, స్ట్రోక్, కరెంట్ షాక్, నీళ్లల్లో మునిగిపోవడం తదితర సందర్భాల్లో గుండె కొట్టుకోవడం ఆగిపోతే.. అత్యవసరంగా ప్రాణాలను రక్షించేందుకు చేసే ప్రక్రియ CPR. సీపీఆర్ ఎలా చేయాలి? హార్ట్ ఎటాక్‌కు, కార్డియాక్ అరెస్టుకు తేడా ఏంటి? తదితర వివరాల కోసం కింది వార్త లింక్ క్లిక్ చేయండి..