క్లాస్ రూం ఫ్లోర్‌‌కు పగుళ్లు.. పాము కరిచి విద్యార్థిని మృతి, రాహుల్ నియోజకవర్గంలో..

తరగతి గదిలో పాము కాటుకు గురై ఓ విద్యార్థిని ప్రాణాలు వదిలిన ఘటన కేరళలోని వయనాడ్‌లో చోటు చేసుకుంది. వివరాల్లోకి వెళ్తే.. షెహ్లా షెరిన్ (9) వయనాడ్‌లోని సుల్తాన్ బథేరీ ఏరియాలో.. ప్రభుత్వ ఆధ్వర్యంలో నడిచే సర్వజన హయ్యర్ సెకండరీ స్కూల్‌లో ఐదో తరగతి చదువుతోంది. షెరిన్ తరగతి గదిలో గోడకు సమీపంలో కూర్చుందని.. గోడకు ఉన్న రంధ్రంలో ఆమె కాలు పెట్టగా.. పాము కాటేసిందని స్కూల్ యాజమాన్యం చెబుతోంది.

షెరిన్ కాలిపై రక్తపు మరకలు ఉండటాన్ని గమనించిన టీచర్.. వెంటనే బాలిక తల్లిదండ్రులకు సమాచారం ఇచ్చారు. ఆ బాలికను హుటాహుటిన సమీపంలోని ప్రయివేట్ హాస్పిటల్‌కు తీసుకెళ్లారు. అక్కడి నుంచి గవర్నమెంట్ తాలుకా హాస్పిటల్‌కు తరలించారు.

బాలిక పరిస్థితి విషమంగా ఉండటంతో.. కోజికోడ్‌లోని గవర్నమెంట్ మెడికల్ కాలేజీ హాస్పిటల్‌కు రిఫర్ చేశారు. ఆమె ఆరోగ్య పరిస్థితి ఆందోళనకరంగా ఉండటంతో.. మెడికల్ కాలేజీ హాస్పిటల్‌లో చేర్చుకోలేదు. చివరకు ఆ బాలిక వయనాడ్ జిల్లాలోని వైథిరిలో ఉన్న ఓ ప్రయివేట్ హాస్పిటల్‌లో చికిత్స పొందుతూ కన్నుమూసింది.

కాగా బయటకు వచ్చిన ఫొటోలను బట్టి.. తరగతి గది ఫ్లోర్ మీద పగులు ఏర్పడిందని.. అందులో బాలిక కాలు పెట్టగా.. అప్పటికే ఆ రంధ్రంలో ఉన్న పాము కాటేసిందని అర్థం అవుతోంది. క్లాస్ రూం ఫ్లోర్ మీద ఇలాంటి గుంతలు చాలా ఉన్నాయని మీడియాలో కథనాలు వస్తున్నాయి.

పాము కాటుకు గురైన షెహ్లా షెరిన్‌కు చికిత్స అందించడానికి స్కూల్ యాజమాన్యం తటపటాయించిందని తోటి విద్యార్థినులు ఆరోపిస్తున్నారు. వయనాడ్ రాహుల్ గాంధీ నియోజకవర్గం కావడంతో.. పాము కాటుకు గురై బాలిక మరణించిన వార్త దేశవ్యాప్తంగా సంచలనమైంది. ఈ ఘటనపై కేరళ ప్రభుత్వం విచారణకు ఆదేశించింది.