పెళ్లి రద్దు.. కుమార్తె సహా తల్లిదండ్రుల ఆత్మహత్య

కుమార్తెకు నిశ్చయించిన పెళ్లి ఆగిపోవడంతో కలతచెందిన తల్లిదండ్రులు.. ఆమెతో సహా విషంతాగి ఆత్మహత్య చేసుకున్నారు. ఈ విషాధ ఘటన తమిళనాడులోని తిరుతురాయిపూండి సమీపాన అమ్మలూరులో చోటుచేసుకుంది. పోలీసులు వెల్లడించిన వివరాల ఆధారంగా.. అమ్మలూర్‌లోని పిళ్లయార్‌కోయిల్ ఉత్తర వీధికి చెందిన గణేశన్ (55) బంగారు నగలు తయారుచేస్తుండేవారు. ఆయనకు భార్య రజతి (50), కుమారులు రాజ్‌కుమార్, హరిహరసుదన్ (20), కుమార్తె గీత (25) ఉన్నారు. రాజ్‌కుమార్‌ ఉద్యోగం నిమిత్తం విదేశాల్లో ఉండగా.. హరిహరసుదన్ ఇంట్లోనే ఉంటున్నాడు.

ఇదిలా ఉంటే గీతకు తిరువరూర్‌కు చెంది అబ్బాయితో పెళ్లి కుదిరింది. నిశ్చితార్థం కూడా అయిపోయింది. వచ్చే ఏడాది జనవరి 24న పెళ్లికి ముహూర్తం పెట్టుకున్నారు. ఏమైందో తెలీదు కానీ ఎలాంటి కారణం లేకుండానే మగ పెళ్లివారు ఈ వివాహాన్ని రద్దు చేసుకున్నారు. ఈ విషయాన్ని నాలుగు రోజుల క్రితం గణేశన్‌కు ఫోన్ చేసి చెప్పారు. ఈ క్రమంలో శనివారం రాత్రి గణేశన్, రజతి, గీత ఇంట్లోనే ఓ గదిలో నిద్రపోగా.. చిన్న కుమారుడు హరిహరసదన్ బయట పడుకొన్నాడు. ఆదివారం ఉదయం నిద్రలేచి ఇంట్లోకి వెళ్లిన హరిహరసదన్‌కు తల్లిదండ్రులు, అక్క విగతజీవులుగా కనిపించారు. వెంటనే ఇరుగుపొరుగు వారి సహాయంతో పోలీసులకు సమాచారం అందించాడు.

దీంతో ఈ ముగ్గురుని హుటాహుటిన తిరుతురాయిపూండి ప్రభుత్వ ఆసుపత్రికి తరలించారు. అప్పటికే వారు చనిపోయినట్లు డాక్టర్లు నిర్ధారించారు. పాలల్లో విషం కలుపుకుని తాగి చనిపోయినట్లు డాక్టర్లు చెప్పారు. అయితే పోలీసులు మాత్రం దీన్ని అనుమానాస్పద మరణాల కింద కేసు నమోదు చేశారు. పెళ్లి ఆగిపోవడం వల్లే వీరు ఆత్మహత్య చేసుకున్నట్లు తేలితే గనుక వరుడు ఇంటి తరఫు వారిపై కేసులు నమోదు చేస్తామని చెప్పారు. ప్రస్తుతం కేసు దర్యాప్తు కొనసాగుతోంది.