యాప్నగరం

బెంగాల్ సీఎం మమత సంచలన నిర్ణయం.. తెలుగువారికి శుభవార్త

బీజేపీ నుంచి గట్టిపోటీ ఎదుర్కొంటున్న పశ్చిమ్ బెంగాల్ సీఎ మమతా బెనర్జీ.. కమలనాధులను నిలువరించడానికి తీవ్రంగా శ్రమిస్తున్నారు. వచ్చే ఎన్నికల్లోనూ విజయం కోసం వ్యూహాత్మకంగా సాగుతున్నారు.

Samayam Telugu 23 Dec 2020, 7:00 am
పశ్చిమ్ బెంగాల్ శాసనసభ ఎన్నికల్లో వరుసగా మూడోసారి అధికారం చేజిక్కించుకోవాలని ముఖ్యమంత్రి మమతా బెనర్జీ వ్యూహాత్మకంగా పావులు కదుపుతున్నారు. బీజేపీ నుంచి గట్టిపోటీ ఎదురువుతున్న నేపథ్యంలో మమతా వ్యూహాత్మకంగా ముందుకెళుతున్నారు. బెంగాల్‌లో స్థిరపడిన తెలుగు ఓటర్లను తనవైపు తిప్పుకోడానికి ప్రయత్నాలు ముమ్మరం చేశారు. ఇందులో భాగంగా తెలుగుకు అధికార భాష హోదా కల్పిస్తూ మంగళవారం జరిగిన క్యాబినెట్‌లో మమతా బెనర్జీ నిర్ణయం తీసుకున్నారు. అంతేకాదు.. తెలుగువారిని తమ రాష్ట్రంలో భాషాపరమైన మైనారిటీలుగా గుర్తించారు.
Samayam Telugu మమతా బెనర్జీ
Chief minister Mamata Banerjee


‘మినీ ఆంధ్రా’గా గుర్తింపు పొందిన ఖరగ్‌పూర్‌లోని తెలుగువారిని ఆకర్షించి, వారి ఓట్లను పొందేందుకే దీదీ ఈ నిర్ణయాలు తీసుకున్నట్టు రాజకీయ నిపుణులు విశ్లేషిస్తున్నారు. రైల్వే ఉద్యోగాల కోసం ఉత్తరాంధ్ర నుంచి వలస వెళ్లి అక్కడే స్థిరపడిన వేలాది మంది తెలుగువారు అక్కడి రాజకీయాల్లో ముఖ్యపాత్ర పోషిస్తున్నారు. ఖరగ్‌పూర్‌ మునిసిపాలిటీలోని 35 వార్డుల్లో ఆరుగురు తెలుగువాళ్లే కౌన్సిలర్లుగా ఉండటం విశేషం.

వివిధ పార్టీల్లో తెలుగువాళ్లు కీలక పదవులు, బాధ్యతలు నిర్వర్తిస్తున్నారు. తెలుగుకు అధికార భాష హోదా కల్పించాలని అక్కడి ప్రజల నుంచి చాలాకాలంగా డిమాండ్‌ వినిపిస్తోంది. మంగళవారం నాటి క్యాబినెట్‌ నిర్ణయాన్ని బెంగాల్‌ విద్యాశాఖ మంత్రి పార్థ చటర్జీ మీడియాకు వెల్లడించారు. హిందీ, ఉర్దూ, నేపాలీ, గురుముఖి, ఒడియా తదితర భాషలకు ఇప్పటికే అధికార భాష హోదాను బెంగాల్ ప్రభుత్వం కల్పించింది.

మరోవైపు, బెంగాల్‌ సీఎం మమతా బెనర్జీకి వరుస షాక్‌లు తగులుతున్నాయి. మంగళవారం జరిగిన క్యాబినెట్‌ సమావేశానికి నలుగురు మంత్రులు డుమ్మా కొట్టారు. మంత్రులు గౌతమ్‌దేవ్‌, రవీంద్రనాథ్‌ ఘోష్‌, చంద్రనాథ్‌ సిన్హా, రాజీవ్‌ బెనర్జీ హాజరుకాకపోవడం రాజకీయ ప్రకంపనలు సృష్టిస్తోంది. ఇటీవలే మంత్రి సుబేందు అధికారి టీఎంసీకి రాజీనామా చేసి బీజేపీలో చేరిన విషయం తెలిసిందే. ఆయనతోపాటు మరో ఆరుగురు ఎమ్మెల్యేలు, ఓ ఎంపీ బీజేపీ తీర్థం పుచ్చుకున్నారు.

తరవాత కథనం

Telugu News App: ఏపీ, తెలంగాణకు సంబంధించిన లేటెస్ట్ అప్‌డేట్స్‌, జాతీయ, అంతర్జాతీయ, ఎడ్యుకేషన్, బిజినెస్, సినిమా, ఆధ్యాత్మికం, స్పోర్ట్స్, వైరల్ కథనాల కోసం తెలుగు సమయం యాప్‌ను డౌన్‌లోడ్ చేసుకోండి.
తాజా వార్తల అప్డేట్ల కోసం Samayam Telugu ఫేస్‌బుక్పేజీను లైక్ చెయ్యండి.