సింగపూర్ పౌరుడిగా చెప్పుకున్న దినకరన్.. ఆర్కే నగర్‌లో గెలిచాడు

ఆర్కే నగర్ ఉప ఎన్నికలో శశికళ వర్గానికి చెందిన టీటీవీ దినకరన్ 40,707 ఓట్ల మెజార్టీతో గెలుపొందారు. సగానికి పైగా ఓట్లను సొంతం చేసుకున్న ఆయన జయలలిత ప్రాతినిధ్యం వహించిన స్థానం నుంచి ఘన విజయం సాధించారు. దీంతో తమిళనాడు రాజకీయాలు కీలక మలుపు తిరిగే అవకాశం ఉందని రాజకీయ విశ్లేషకులు అభిప్రాయం వ్యక్తం చేస్తున్నారు. ఇప్పటికే పలువురు రాజకీయ నేతల స్వరంలో మార్పు రావడం దీనికి నిదర్శనంగా చెబుతున్నారు. ఆర్కే నగర్ ఉపఎన్నికలో ఘన విజయంతో దేశం దృష్టిని ఆకర్షించిన దినకరన్ గురించి వివరాలు...

* శశికళకు దినకరన్, భాస్కరన్, సుధాకరన్ అనే ముగ్గురు మేనళ్లులు ఉన్నారు. వీరిలో జయ సుధాకరన్‌ను దత్తత తీసుకుని తర్వాత పక్కనబెట్టారు. జయ అధికారంలో ఉన్నప్పుడు దినకరన్ అన్నాడీఎంకే ఎంపీగా వ్యవహరించారు. తర్వాత జయ పార్టీ వ్యవహరాల నుంచి ఆయన్ను దూరంగా ఉంచారు.

* జయ మరణం తర్వాత శశికళతో కలిసి దినకరన్ పోయెస్ గార్డెన్‌కు మకాం మార్చారు. జయ మృతదేహం వద్ద శశికళ వెనుకాలే నిలబడ్డారు.

* ఫిబ్రవరి 15న జైలుకు వెళ్లే ముందు శశికళ దినకరన్‌ను అన్నాడీఎంకే డిప్యూటీ జనరల్ సెక్రటరీగా నియమించింది.

* జయ అధికారంలో ఉన్నప్పుడు ఐదేళ్లపాటు పార్టీ ఆఫీ‌స్‌కు దూరంగా ఉన్న దినకరన్.. శశికళ అండతో.. అమ్మ మరణం తర్వాత పార్టీలోకి వచ్చారు. అన్నాడీఎంకే వ్యవహారాల్లో, ప్రభుత్వ వ్యవహారాల్లో ఆయన కలగజేసుకోవడం ప్రారంభమైంది.

* పన్నీరు వర్గం, ఓపీఎస్ వర్గం ఒక్కటయ్యాక.. దినకరన్‌ను అన్నాడీఎంకే నుంచి బహిష్కరించారు.

* ఫెరా నిబంధలను ఉల్లంఘించిన కేసులో ఈడీ దినకరన్‌పై విచారణ చేపట్టింది. 1991-95 మధ్య ఆయన బ్యాంకు ఖాతాల్లో లెక్కలు చెప్పకుండా భారీ నగదు డిపాజిట్లు జరిగాయనే విషయమై ఈడీ విచారణ కొనసాగుతోంది.

* నేను సింగపూర్ పౌరుణ్ని అని చెప్పిన ఆయన ఈడీ విచారణ నుంచి తప్పించుకునే ప్రయత్నం చేశాడు. కానీ వీటిని పట్టించుకోని ఈడీ మనీ లాండరింగ్‌ కేసులో ఆయన్ను దోషిగా తేల్చింది.

చదవండి: ఆర్కే నగర్ ఉపఎన్నికలో దినకరన్ ఘన విజయం

* 2017 జనవరి 6న మద్రాస్ హైకోర్టు దినకరన్‌కు రూ. 25 కోట్ల జరిమానా విధించింది.

* ధన బలంతో దినకరన్, ఇతర అభ్యర్థులు ఆర్కే నగర్ ఉపఎన్నికను ప్రభావితం చేస్తున్నారనే కారణంతో ఏప్రిల్ 12న జరగాల్సిన ఎన్నికను ఎన్నికల సంఘం వాయిదా వేసింది.