​మోడీ తర్వాత ప్రధానమంత్రి ఎవరంటే..!

అనూహ్యంగా యూపీ ముఖ్యమంత్రి గా ఎన్నికైన యోగి ఆదిత్యనాథ్ ను కాబోయే ప్రధానమంత్రి అని అంటున్నాయి.. భారతీయ జనతా పార్టీ శ్రేణులు. వారి వాదనకు తోడు విశ్లేషకులు మాట కూడా యోగి ప్రధానమంత్రి అయ్యే అవకాశాలున్నాయని వ్యాఖ్యానిస్తున్నారు. ఈ వాదనకు అనుగుణంగా అనేక విషయాలను ప్రస్తావిస్తున్నారు వీరంతా. ఇప్పుడప్పుడే కాదు కానీ, 2024 లో యోగి ఆదిత్యనాథ్ భారతదేశానికి ప్రధానమంత్రి అవుతాడని కమలనాథులు, విశ్లేషకులు అంటున్నారు. ఈ వాదనకు అనుగుణంగా ముందుగా ప్రస్తావిస్తున్నది ‘వయసు’ అంశాన్ని.

ప్రస్తుతం నరేంద్రమోడీ వయసు 66 సంవత్సరాలు. మోడీ భారతీయ జనతా పార్టీలో అమలు చేస్తున్న నియమం ప్రకారం ఎవరూ కూడా 75 యేళ్ల వయసుకు మించి ముఖ్య పదవుల్లో ఉండకూడదు. 75 యేళ్ల వయసుకు చేరిన వారిని కేంద్రమంత్రి పదవుల నుంచి రాజీనామా చేయిస్తున్నారు, సీఎంల హోదాల్లో కూడా ఉంచడం లేదు. ఈ నియమాన్ని పెట్టింది నరేంద్రమోడీనే. మరో తొమ్మిది సంవత్సరాల తర్వాత మోడీ 75 యేళ్ల వయసుకు చేరతారు. ప్రధానమంత్రి పీఠం నుంచి అప్పుడు ఆయన వైదొలగాల్సి ఉంటుంది. తను పెట్టిన నియమాన్ని తను పాటిస్తే మోడీ తప్పుకోక తప్పదు.

ఈ లెక్క ప్రకారం 2024 ఎన్నికల తర్వాత ప్రభుత్వం ఏర్పడి మోడీ ప్రధాని అయితే.. అదే టర్మ్ లో ఆయన 75 యేళ్లను పూర్తి చేసుకుంటారు. తద్వారా పీఠం అధిష్టించే అర్హత కోల్పోతారు. ఇప్పుడు మోడీ సహచరులుగా మంత్రి వర్గంలో ఉన్న నేతలు కూడా చాలా మంది ఆ సమయానికి 75 యేళ్ల వయసుకు అటూఇటూ ఉంటారు. దీంతో వారెవరికీ కూడా అవకాశం ఉండదు. ఒక్క యోగి ఆదిత్యనాథ్ కు తప్ప! అనేది విశ్లేషకుల మాట.

ప్రస్తుతం యోగి వయసు 44 సంవత్సరాలు. మరో తొమ్మిదేళ్ల తర్వాత అనుకుంటే.. అప్పటికి 53 యేళ్ల వయసుంటుంది యోగికి. యూపీ ముఖ్యమంత్రిగా బోలెడంత అనుభవం కూడా సంపాదించుకుంటారు యోగి. దీంతో ఆయనకు ప్రధాని పీఠాన్ని అధిష్టించే అన్ని రకాల అర్హతలూ ఉన్నట్టవుతుందని కమలనాథులు అభిప్రాయపడుతున్నారు. ఈ లెక్క ప్రకారం మోడీ తర్వాత దేశానికి ప్రధాని యోగినే అని కమలనాథులు చెబుతున్నారు. మరి కాషాయ 2024 వరకూ అధికారాన్ని నిలుపుకోగలిగితే అప్పటి సంగతి ఇదంతా!