నన్ను కొట్టనంటే కేబినెట్ మీటింగ్‌కు వస్తా..!

'నన్ను కొట్టనంటేనే కేబినెట్ మీటింగ్‌కు వస్తా'... ఈ మాట అన్నదెవరో కాదు. సాక్షాత్తూ ఢిల్లీ సీఎస్ అన్షు ప్రకాష్. ఆప్ పార్టీ ఎమ్మెల్యేలు తనపై దాడి చేసిన తర్వాత ఆయన కాస్త కలత చెందినట్లు ఉన్నారు. బడ్జెట్ సెషన్స్‌పై చర్చించేందుకు ఓ సమావేశం ఏర్పాటు చేయాలనుకుంటున్నట్లు... సీఎం అరవింద్ కేజ్రీవాల్‌కు ఆయన ఓ లేఖ రాశారు. ఈ లెటర్‌లో తన ఆవేదనను తెలియజేశారు. ప్రభుత్వ పాలన సజావుగా సాగాలని... ఢిల్లీ ఉద్యోగులు కష్టపడి పనిచేస్తున్నారని ప్రస్తావించారు. బడ్జెట్ సమావేశాలకు సంబంధించి షెడ్యూల్‌ను చర్చిచేందుకు తాను, ఇతర అధికారులు సమావేశానికి వస్తున్నామన్నారు.

బడ్జెట్ సెషన్స్‌ అంశాలతో పాటూ... మరికొన్ని విషయాలను ప్రస్తావించారు. ఈ సమావేశానికి వచ్చినప్పుడు తమపై ఎలాంటి దాడి జరగదని సీఎం హామీ ఇస్తేనే వస్తామన్నారు అన్షు ప్రకాష్. సమావేశం హుందాగా నడవాలని కోరుకుంటున్నామని లేఖలో రాశారు. ఇప్పుడీ లెటర్ హాట్ టాపిక్‌గా మారింది. మరి దీనిపై కేజ్రీవాల్ ఎలా స్పందిస్తారన్నది ఆసక్తిగా మారింది.