వివాహిత ఆత్మహత్యాయత్నం.. కాపాడిన భర్త

అనారోగ్యానికి గురైన 22 ఏళ్ల మహిళ.. తన భర్తను ఇబ్బంది పెట్టడం ఇష్టంలేక ఆత్మహత్యకు ప్రయత్నంచింది. ఈ సంఘటన సోమవారం (జులై 23) యూపీలో జరిగింది. వివరాల్లోకి వెళ్తే.. లక్నోలోని బాలగంజ్‌కు చెందిన మహ్మద్ రఫిక్, గుల్ అఫ్షాన్ ఖతూన్‌లకు ఏడాదిన్నర క్రితం వివాహం జరిగింది. వీరికి నెలరోజుల పాప కూడా ఉంది. అయితే ఇటీవల ఖతూన్‌ అనారోగ్యానికి గురికావడంతో వైద్య పరీక్షల కోసం భర్త రఫిక్ ఆమెను గోమతినగర్‌లోని ఓ ఆస్పత్రికి తీసుకెళ్లాడు.

మధ్యాహ్నం 2:30 సమయంలో ఇంటికి తిరిగి వస్తున్న క్రమంలో.. సమతా ములక్ క్రాసింగ్ సమీపంలోకి రాగానే కళ్లు తిరుగున్నాయని, బైక్ ఆపాల్సిందిగా భర్తను కోరింది ఖతూన్. దీంతో రఫిక్ బైక్ ఆపగానే వేగంగా నడుచుకుంటూ వెళ్లి.. పక్కనే ఉన్న గోమతి నదిలోకి దూకేసింది. ఈ హఠాత్ పరిణామానికి కంగారుపడ్డ ఆమె భర్త కూడా ఏమాత్రం ఆలస్యం చేయకుండా భార్యను రక్షించడానికి నదిలోకి దూకాడు. ఇది గమనించిన స్థానికులు సంబంధిత సిబ్బందిని అప్రమత్తం చేయడంతో.. వారు నదిలోకి దిగి ఇద్దరినీ సురక్షితంగా ఒడ్డుకు చేర్చారు.

విషయం తెలుసుకున్న పోలీసులు అక్కడకు చేరుకుని.. వారిని ఆసుపత్రికి తరలించారు. తన భార్య కొంతకాలంగా మానసిక వ్యాధితో బాధపడుతోందని.. ఇందుకు సంబంధించిన చికిత్స పొందుతుందని రఫిక్ పోలీసులకు తెలిపాడు. ఈ ప్రాంతంలో పోలీసుల పర్యవేక్షణ సరిగా లేని కారణంగా ఇలాంటి ఘటనలు తరచుగా జరుగుతున్నాయని స్థానికులు ఆరోపిస్తున్నారు. అయితే ఈ విషయంపై స్పందించిన అధికారులు. ఈ ప్రాంతంలో సరైన గస్తీ, గజ ఈతగాళ్లు ఉన్నప్పటికీ.. ఇలాంటి సంఘటన జరగడం దురదృష్టకరమని అన్నారు. ఇకపై మరింత అలర్ట్‌గా ఉంటామని తెలిపారు.