యడ్యూరప్ప అను నాను..

కర్ణాటక ముఖ్యమంత్రిగా యడ్యూరప్ప ప్రమాణస్వీకారం చేయడానికి సర్వం సిద్ధం అయ్యింది. నేటి ఉదయం 9.01 నిమిషాలకు యడ్యూరప్ప ప్రమాణస్వీకారం చేయనున్నారు. తీవ్రమైన రాజకీయ ప్రతిష్టంభన మధ్యన యడ్యూరప్ప ప్రమాణస్వీకారం చేస్తుండటం గమనార్హం. ప్రభుత్వ ఏర్పాటుకు బీజేపీకి అవకాశం ఇవ్వడం అనైతికం అని కాంగ్రెస్ పార్టీ అంటోంది. గవర్నర్ అధికార దుర్వినియోగం చేశారని మండిపడుతోంది. తాము, జేడీఎస్‌లు పొత్తుతో ఉన్నామని.. తమకు అవకాశం ఇవ్వకుండా బీజేపీకి ఛాన్స్ ఇవ్వడం ఏమిటని కాంగ్రెస్ నేతలు వాదిస్తున్నారు.

తమ పార్టీ ఎమ్మెల్యేలను భారతీయ జనతా పార్టీ కొనుగోలు చేస్తోందని జేడీఎస్ నేతలు మండిపడుతున్నారు. ఫిరాయించే ఒక్కో ఎమ్మెల్యేకూ వంద కోట్ల రూపాయల డబ్బు, మంత్రి పదవి ఇస్తామనే హామీని ఇస్తున్నారని జేడీఎస్ నేతలు అంటున్నారు.

కర్ణాటక అసెంబ్లీ ఎన్నికల్లో ఏ పార్టీకీ సంపూర్ణ మెజారిటీ రాకపోవడంతో ఈ రకమైన పరిస్థితి తలెత్తింది. ఇదిలా ఉంటే రాజ్‌భవన్‌లో ప్రమాణస్వీకారానికి ఏర్పాట్లు పూర్తి అయ్యాయి. అక్కడకు బీజేపీ ముఖ్యనేతలు, ప్రధాన కార్యకర్తలు చేరుకున్నారు. ప్రమాణస్వీకారానికి ముందు యడ్యూరప్ప సంజయ్ నగర్ లోని రాధాకృష్ణ టెంపుల్‌ను సందర్శించారు. నేటి కార్యక్రమంలో యడ్యూరప్పతో పాటు ఇద్దరుముగ్గురు మంత్రులు కూడా ప్రమాణస్వీకారం చేయవచ్చునని సమాచారం.