​రాజకీయాల్లో ఉండను..యోగి సంచలన ప్రకటన!

ఒకవైపు కొందరు బీజేపీ కార్యకర్తలు యోగి ఆదిత్యనాథ్ ను భావి ప్రధాని.. అని అంటూ ఉంటారు. ప్రధాని నరేంద్రమోడీ అనంతరం ఆ బాధ్యతలను చేపట్టబోయేది యోగినే అని వీరు చెబుతూ ఉంటారు. యూపీ అసెంబ్లీ ఎన్నికల్లో భారతీయ జనతా పార్టీ సాధించిన సంచలన విజయానంతరం యోగి ఆ రాష్ట్రానికి ముఖ్యమంత్రిగా పదవీ బాధ్యతలు స్వీకరించారు. తనదైన పాలనతో ముందుకు వెళ్తున్నారు.

ఈ క్రమంలో యోగి వద్ద ‘కాబోయే ప్రధానమంత్రి..’ అనే ఊహాగానాలను ప్రస్తావించగా, వాటిని ఆయన ఖండించారు. ఇదే సమయంలో తను దీర్ఘ కాలం రాజకీయాల్లో ఉండను అనే ప్రకటనను కూడా చేసి ఆశ్చర్యపరిచారు ఆదిత్యనాథ్. ప్రధాని మోడీ, బీజేపీ జాతీయాధ్యక్షుడు అమిత్ షాలు తనకు యూపీ ముఖ్యమంత్రిగా బాధ్యతలు ఇవ్వడం తన అదృష్టం అని యోగి వ్యాఖ్యానించారు. ఈ బాధ్యతలు పూర్తి చేసిన అనంతరం తను మఠానికి వెళ్లిపోతాను అని ఆయన స్పష్టం చేశారు.

అయితే తను ఎన్నేళ్లు యూపీకి ముఖ్యమంత్రిగా ఉండాలని అనుకుంటున్నదీ యోగి చెప్పలేదు. తన బాధ్యతలు పూర్తి అయిన అనంతరం మఠానికి వెళ్లిపోతాను అని మాత్రం ఆయన స్పష్టం చేశారు. మరోవైపు ఎమ్మెల్యేగా ఎన్నియ్యే ప్రయత్నంలో ఉన్నారు ఆదిత్యనాథ్. ముఖ్యమంత్రిగా బాధ్యతలు స్వీకరించిన తర్వాత ఎమ్మెల్సీగా కానీ, ఎమ్మెల్యేగా కానీ ఎన్నిక కావాల్సిన నేపథ్యంలో యోగి ఎక్కడ నుంచి పోటీ చేస్తారనేది ఆసక్తికరంగా మారింది. ఈ విషయంలో అధిష్టానం ఆదేశాలకు అనుగుణంగా నడుచుకుంటానని ఆయన తెలిపారు.