ఓ సన్యాసికి సీఎం పదవి ఎందుకిచ్చారు?

ప్రతిష్టాత్మక ఉత్తర ప్రదేశ్ అసెంబ్లీ ఎన్నికల్లో భారతీయ జనతా పార్టీ (బీజేపీ) ఘనవిజయం సాధించిన తరవాత ముఖ్యమంత్రిగా ఎవరిని నియమిస్తారని అందరూ ఎదురుచూశారు. ఒకానొక దశలో కేంద్ర హోం మంత్రి రాజ్‌నాథ్ సింగ్‌ను యూపీ సీఎం పీఠం ఎక్కిస్తారని కూడా వార్తలు వచ్చాయి. మొత్తానికి యోగి ఆదిత్యనాథ్‌ను యూపీ ముఖ్యమంత్రిగా బీజేపీ అధిష్ఠానం ప్రకటించింది. అయితే ఆయనొక సన్యాసి. ముస్లింల పట్ల వివక్ష చూపుతున్నారని ఇప్పటికే ఆరోపణలు ఎదుర్కొంటున్న బీజేపీ ఇప్పుడు యూపీలో ఓ హిందూ సన్యాసిని సీఎంగా నియమించే సాహసం ఎందుకు చేసింది? అసలు యోగి ఆదిత్యనాథ్ చరిత్రేమిటి..?

గోరఖ్‌నాథ్ మఠంలోని రికార్డుల ఆధారంగా.. ఆదిత్యనాథ్ అప్పటి ఉత్తరప్రదేశ్‌లోని గర్‌హ్వాల్ డివిజన్‌లో 1972 జూన్ 5 జన్మించారు. ఈయనది గర్‌వాలీ రాజ్‌పుత్ కుటుంబ నేపథ్యం. ఆదిత్యనాథ్ అసలు పేరు అజయ్ సింగ్ బిష్త్. ఈయన బాల్యం గురించి పెద్దగా వివరాలు లేనప్పటికీ.. ప్రస్తుతం ఉత్తరాఖండ్‌లో ఉన్న హెచ్ఎన్‌బీ గర్‌హ్వాల్ యూనివర్సిటీ నుంచి ఆదిత్యనాథ్ మ్యాథ్స్‌లో బీఎస్సీ పట్టా పొందారు. తన 21వ ఏట సన్యాసం తీసుకున్నారు. పేరును కూడా మహంత్ ఆదిత్యనాథ్‌గా మార్చుకున్నారు. ఆ తరవాత గోరఖ్‌నాథ్ మఠానికి ప్రధాన గురువుగా బాధ్యతలు చేపట్టారు.

గోరఖ్‌నాథ్ మఠం ఆధ్వర్యంలో స్కూళ్లు, కాలేజీలు, ఆసుపత్రి నడిపారు. ఆ తరవాత 1996లో రాజకీయాల్లోకి అడుగుపెట్టారు. 1998లో తనను తాను యోగిగా ప్రకటించుకున్నారు. అదే సంవత్సరం లోక్‌సభకు ఎన్నికయ్యారు. 26 సంవత్సరాలకే లోక్‌సభకు ఎన్నికైన ఆదిత్యనాథ్.. 12వ లోక్‌సభలో అతిపిన్న వయసు గల ఎంపీగా నిలిచారు. ఆ తరవాత వరసగా 1999, 2004, 2009, 2014లో లోక్‌సభకు ప్రాతినిధ్యం వహించారు. యోగిగానే కాకుండా మంచి రాజకీయవేత్తగాను గుర్తింపు తెచ్చుకున్నారు 44 ఏళ్ల యోగి ఆదిత్యనాథ్. అందుకనే ఈశాన్య ఉత్తరప్రదేశ్‌పై మంచి పట్టున్న ఈ సన్యాసిని రాష్ట్ర ముఖ్యమంత్రి పీఠం ఎక్కించాలని బీజేపీ నిర్ణయించింది.