9 అంతస్తుల బిల్డింగ్.. టెర్రస్‌పై యువతి ఎక్సర్‌సైజ్, కాసేపటికే రక్తం కక్కుకుని...

ఉదయం వేళ తన సోదరుడితో కలిసి వ్యాయామం చేసేందుకు అపార్ట్‌మెంట్‌ పైకి వెళ్లిన యువతి ప్రమాదవశాత్తూ కిందపడి ప్రాణాలు కోల్పోయిన ఘటన కేరళలో చోటుచేసుకుంది. కొచ్చిలోని చిత్తోర్‌ రోడ్డులో ఉన్న ఒక అపార్ట్‌మెంట్‌లో ఐరిస్‌రాయ్(18) అనే యువతి తన కుటుంబంతో కలిసి నివసిస్తోంది. రోజూ ఉదయం సోదరుడు అలస్‌తో కలిసి అపార్ట్‌మెంట్ టెర్రస్‌పైకి వెళ్లి ఎక్సర్‌సైజులు చేస్తుంటుంది.

ఇదే మాదిరిగానే ఐరిస్‌రాయ్, అమె సోదరుడు గురువారం ఉదయం పైకి వెళ్లి వ్యాయామాలు చేస్తున్నారు. కొద్దిరోజులుగా కురుస్తున్న వర్షాలకు టెర్రస్‌పై కాస్త నాచు పట్టింది. పైగా దానికి సేఫ్టీ వాల్‌ కూడా లేదు. ఈ క్రమంలోనే వ్యాయామం చేసి అలిసిపోయిన ఐరిస్ అక్కడే ఉన్న బెంచ్‌పై కూర్చుని సోదరుడితో ముచ్చట్లు పెట్టింది. సడెన్‌గా పైకి లేచి నాచుపై కాలు వేయడంతో ఒక్కసారిగా జారి పైనుంచి కిందికి పడిపోయింది.

ఆమె అరుపులకు ఉలిక్కిపడిన కుటుంబసభ్యులు, అపార్ట్‌‌మెంట్ వాసులు చూసేసరికే ఐరిస్ కిందపడిపోయింది. తలకు బలమైన గాయమై తీవ్ర రక్తస్రావం కావడంతో అపస్మారక స్థితిలోకి వెళ్లిపోయింది. దీంతో ఆమెను హుటాహుటిన సమీపంలోని ఓ ప్రైవేట్ ఆస్పత్రికి తరలించగా అప్పటికే చనిపోయినట్లు డాక్టర్లు నిర్ధారించారు. కుటుంబసభ్యుల ఫిర్యాదు మేరకు పోలీసులు కేసు నమోదు చేసి దర్యాప్తు చేపట్టారు. ఐరిస్‌రాయ్ మృతదేహన్ని స్వాధీనం చేసుకుని పోస్టుమార్టం నిమిత్తం ప్రభుత్వ ఆసుపత్రికి తరలించారు.